Lajm4 Nov 2021

Ahmetaj e krahason “bashkëqeverisjen” me krijimin e Apple nga Steve Jobs

Shumica socialiste miratoi në Kuvend ligjin kontravers “për bashkëqeverisjen”, i cili ngre në nivel ligjor platformën elektorale të PS-së. Opozita e kundërshtoi ligjin si një kontroll politik mbi administratën.

Autor: Blerina Gjoka BIRN Tiranë
Printo

Komisioni për çështjet ligjore, administratën publike dhe të drejtat e njeriut. Foto: Xhemali Moku/Birn

Kuvendi miratoi të enjten vetëm me votat e Partisë Socialiste ligjin “për bashkëqeverisjen”, i cili i jep formë ligjore një platforme elektorale të kësaj partie. Projekti i sjellë në Kuvend nga qeveria,  i ndryshuar në formulim, por pa i prekur thelbin në Komisionin e Ligjeve, mori 73 vota pro dhe 42 kundër në seancën plenare.

Në mbrojtje të ligjit dolën një sërë ministrash dhe deputetësh të mazhorancës, të cilët e cilësuan një hap drejt bashkëqeverisjes me qytetarët. Sipas tyre ligji garanton, që çdo ankesë e qytetarëve do të gjejë zgjidhje në kohë reale nëpërmjet kësaj platforme elektronike.

Agjencia për Dialog dhe Bashkëqeverisje që do të funksionojë në bazë të këtij ligji nën varësinë e Kryeministrit merr kompetenca për të kontrolluar punën në administratën qendrore dhe asaj vendore dhe çdo institucioni tjetër publik për të cilët ankohen qytetarët.

Çdo institucion ka detyrim t’i përgjigjet koordinatorit të agjencisë brenda një afati 10-20 ditë. Koordinatorëve u jepen kompetenca për të propozuar masa administrative deri në shkarkim të titullarëve, qofshin ata dhe ministra.

Zv/kryeministri Arben Ahmetaj tha se platforma digjitale ku qytetarët do të ankohen është një progres të cilin opozita e gjykon ngushtë. “Mund t’ju sjell shembuj që nga shpikja e lavatriçes deri tek Apple që janë përqeshur. Edhe Steve Jobs kështu e tallën. E njëjta gjë është edhe me ligjin e bashkëqeverisjen”- tha ai.

Ndërsa ministri i Drejtësisë Ulsi Manja bëri një përshkrim të administratës shtetërore si një sistem burokracie të sofistikuar. “Ata për të cilët po flas nuk denjojnë që të kthejnë përgjigje as në një copë letër”-tha ai duke i veshur Agjencisë atributet e zgjidhjes së halleve të njerëzve në raport me administratën.

Për opozitën kjo agjenci është një kambanë alarmi për demokracinë pasi sjell centralizim të pushtetit dhe kontrollit në duart e kryeministrit. Deputetja e PD-së Jorida Tabaku e cilësoi një “qeveri paralele” të Ramës ngritjen e Agjencisë, që sipas saj, “do të jetë zbatuese e funksioneve partiake”. Për deputetin Oerd Bylykbashi ligji bie në kundërshtim me Kodin e Procedurës Administrative duke e futur punonjësin publik në konfuzion.

Deputetë të tjerë të opozitës e krahasuan agjencinë me strukturat politike të kontrollit të përdorura nga regjimi komunist dhe e cilësuan atë një sistem patronazhist të ligjëruar, që mund të përdorë të dhënat personale të qytetarëve për arsye politike.

Ligji është kritikuar dhe nga organizatat e shoqërisë civile. Komiteti Shqiptar i Helsinkit dërgoi sugjerime me shkrim në Komisionin e Ligjeve duke argumentuar papajtueshmërinë e ligjit me ligje të tjera dhe rrezikimin e përqendrimit të pushtetit e kontrollit në duart e kryeministrit. Sugjerimet nuk u morën parasysh nga mazhoranca socialiste. Partia Demokratike ka paralajmëruar se do të kërkojë shfuqizimin e tij në Gjykatën Kushtetuese.

Leave a Reply

Your email address will not be published. Required fields are marked *