Zëvendës-Presidentja e Parlamentit Europian, Ulrike Lunacek, u ka kërkuar vendeve kandidate të marrin masa për të siguruar që gazetarët investigativë që punojnë mbi korrupsionin në fushën e energjisë të kryejnë detyrën e tyre pa pasur frikë nga dhuna ose kërcënimet.
“BE promovon lirinë e shprehjes përgjatë bisedimeve me vendet kandidate, si dhe mbështet ekselencën në gazetarinë investigative,” tha Lunacek të premten.
“Vendet kandidate dhe ato potenciale për kandidate për anëtarësimin në BE duhet të sigurojnë që gazetarët të mund të kryejnë punën e tyre pa frikë nga dhuna ose kërcënimet,” shtoi ajo.
Deklarata e Lunacek vjen në përforcim të një raporti të SEE Change Network, një grup mjedisor, i cili thotë se gazetarët “që janë mjaftueshëm të guximshëm për të provuar dhe për t’u konfrontuar me figura të pushtetshme në shoqëri kanë rënë pre e presioneve, kërcënimeve, ngacmimeve ose dhe janë hedhur në gjyq vetëm se janë përpjekur për të nxjerrë në pah keqbërjet”.
Gjatë dy javëve të kaluara, BIRN ka publikuar një seri investigimesh, të cilat kanë hedhur dritë mbi mënyrën se si rrethi i ngushtë i ish-kryeministrit shqiptar, Sali Berisha, ka përfituar miliona euro nga marrëveshjet e dyshimta me tokat në një park energjitik.
Raporti, Fitues dhe Humbës: Kush përfiton nga korrupsioni në nivele të larta në sektorin e energjisë në Europën Jug-Lindore (Winners and Losers: Who benefits from high-level corruption in the South East Europe energy sector?) përmbledh një seri rastesh të korrupsionit në nivelet e larta që kanë prekur sektorin e energjisë në Shqipëri, Bosnje, Kroaci, Kosovë, Maqedoni, Malin e Zi dhe Serbi, duke ilustruar se si korrupsioni ndikon në qendrueshmërinë e sistemeve të energjisë në këto vende.
Raporti përfshin rastin e ish-kryeministrit kroat Ivo Sanader, i cili u dënua për marrjen e një rryshfeti prej dhjetë millionë euro nga kompania hungareze MOL, si dhe atë të kryeparlamentarit shqiptar, Ilir Meta, mbi akuzat për korrupsion mbi një rryshfet të paprovuar për ndërtimin e një hidrocentrali.
