Guvernatori i Bankës së Shqipërisë Ardian Fullani u arrestua sot në mbrëmje, bëhet e ditur nga burime mediatike jozyrtare. Fullani u arrestua në zyrën e tij pasi mësohet se prokuroria ka siguruar një urdhërarresti të lëshuar nga gjykata. Policia e Tiranës kreu ekzekutimin e urdhërarrestit.
Krahas Fullanit mësohet se është arrestuar edhe Inspektorja e Përgjithshme e Bankës së Shqipërisë Elivar Golemi.
Të dy akuzohen për shpërdorim detyre në lidhje me ngjarjen e vjedhjes së një shume parash në thesarin e Bankës së Shqipërisë.
Fullani pati arritur t’i shpëtojë largimit nga posti i tij pasi shpërtheu skandali muajin e kaluar. Këshilli Mbikëqyrës i Bankës së Shqipërisë pati refuzuar propozimin e anëtares së Këshillit Ermelinda Meksi për shkarkimin e tij ndërsa partitë politike qenë shprehur në shumicë në mbrojtje të tij.
Fullani vijon të mbetet formalisht guvernator i Bankës së Shqipërisë, pasi shkarkimi i tij sipas ligjit mund të bëhet vetëm në rast se mbi të rëndon një vendim dënimi me burg.
Guvernatori Fullani, 59 vjeç, qe përballur me zemërimin e publikut gjatë muajit të fundit me disa protesta në shkallë të vogël të organizuar kundër tij në lidhje me vjedhjen. Banka e Shqipërisë njoftoi më 21 korrik 2014 se pati denoncuar dy punonjës të vet për vjedhje dhe moskallëzim krimi. Të dy punonjësit i përkisnin Departamentit të Emisionit në Bankën e Shqipërisë, departamenti përgjegjës për magazinimin dhe ruajtjen e parave si dhe për marrëdhëniet e qarkullimit fizik të parasë me bankat e nivelit të dytë.
Më vonë Banka e Shqipërisë njoftoi se i rezultonte se punonjësi Ardian Bitraj pati arritur të vjedhë 713 milionë lekë, (rreth 5 milionë euro). Bitraj mësohet nga prokuroria se e ka pranuar përgjegjësinë dhe se e ka kryer vjedhjen gradualisht përgjatë katër viteve duke përfituar nga keqmenaxhimi i punëve në bankë. Më vonë, prokuroria arrestoi edhe një numër zyrtarësh të tjerë të bankës, përgjegjës për emisionin, inventarizimin dhe kontabilizimin.
Guvernatori i arrestuar Ardian Fullani u diplomua për ekonomi në Universitetin e Tiranës në vitin 1977. Ai ka punuar në pozicione të ndryshme në Bankën e Shqipërisë nga viti 1985 deri në vitin 1996.
Ai mësohet se qe pushuar nga puna në BSH në këtë vit si pjesë e spastrimeve politike të kryera nga qeveria e Partisë Demokratike në atë kohë dhe pas kësaj punoi për një periudhë të shkurtër kohe për një fond mikrokrediti të quajtur FEFAD. Një vit më vonë, ai u bë zëvendësdrejtor i Bankës Italo-Shqiptare, një bankë nën bashkëpronësi mes shtetit shqiptar, një banke italiane dhe Bankës Europiane për Rindërtim dhe Zhvillim.
Ai arriti të bëhet guvernator në vitin 2004 kur u zgjodh nga maxhoranca parlamentare e udhëhequr nga Fatos Nano. Largimi i Nanos si president një vit më vonë nuk duket se ndryshoi gjë për Fullanin, i cili arriti të mbajë marrëdhënie të mira me qeverinë e re. Për më tepër, maxhoranca e Partisë Demokratike e udhëhequr nga Sali Berisha, e rizgjodhi atë guvernator në vitin 2011. Fullani u bë kështu guvernatori i vetëm që arriti të rizgjidhet që nga krijimi i Bankës së Shqipërisë në formën aktuale në vitin 1992.
Gjatë kohës së tij si guvernator, ai është njohur për marrëdhënie miqësore me klasën politike në vend duke u përballur me vetëm shumë pak raste mosmarrëveshjesh verbale me qeverinë Berisha në vitin 2009, kur kjo e fundit e shtyu vendin drejt falimentit përmes projektit të ndërtimit të rrugës Rrëshen-Kalimash.
Fullani dukej se pati marrëdhënie të mira edhe me qeverinë socialiste të Edi Ramës, por gjërat për të morën të tatëpjetën shpejt pas njoftimit të vjedhjes së 713 milionë lekëve.
Në mungesë të Fullanit, Banka e Shqipërisë do të drejtohet nga zëvendësguvernatori.
Gjykata e Tiranës pritet të vendosë nëse Fullani do të mbahet në arrest gjatë periudhës para daljes në gjyq apo nëse do të lirohet me kusht brenda 48 orësh nga arrestimi.
Ai arriti të bëhet guvernator në vitin 2004 kur u zgjodh nga maxhoranca parlamentare e udhëhequr nga Fatos Nano. Largimi i Nanos si president një vit më vonë nuk duket se ndryshoi gjë për Fullanin, i cili arriti të mbajë marrëdhënie të mira me qeverinë e re. Për më tepër, maxhoranca e Partisë Demokratike e udhëhequr nga Sali Berisha, e rizgjodhi atë guvernator në vitin 2011. Fullani u bë kështu guvernatori i vetëm që arriti të rizgjidhet që nga krijimi i Bankës së Shqipërisë në formën aktuale në vitin 1992.
Gjatë kohës së tij si guvernator, ai është njohur për marrëdhënie miqësore me klasën politike në vend duke u përballur me vetëm shumë pak raste mosmarrëveshjesh verbale me qeverinë Berisha në vitin 2009, kur kjo e fundit e shtyu vendin drejt falimentit përmes projektit të ndërtimit të rrugës Rrëshen-Kalimash.
Fullani dukej se pati marrëdhënie të mira edhe me qeverinë socialiste të Edi Ramës, por gjërat për të morën të tatëpjetën shpejt pas njoftimit të vjedhjes së 713 milionë lekëve.
Në mungesë të Fullanit, Banka e Shqipërisë do të drejtohet nga zëvendësguvernatori.
Gjykata e Tiranës pritet të vendosë nëse Fullani do të mbahet në arrest gjatë periudhës para daljes në gjyq apo nëse do të lirohet me kusht brenda 48 orësh nga arrestimi.
Inspektorja e Përgjithshme e Bankës së Shqipërisë, Elivar Golemi, ka punuar gjithashtu në Bankën e Shqipërisë prej shumë vitesh dhe është zgjedhur në këtë post nga Kuvendi i Shqipërisë në vitin 2011. Ajo pati një konflikt publik me kreun e komisionit parlamentar të Ekonomisë Erjon Braçe gjatë ditëve të fundit.
Vijon
