Pak ditë pasi zyrtarët e Shteteve të Bashkuara akuzuan politikanët në pushtet të Bosnjës për neglizhencë dhe korrupsion, ministri i jashtëm i akuzon ata për dezinformim dhe favoritizëm.
Ministri i Jashtëm i Bosnjës Zlatko Lagumdzija thirri në takim të ngarkuarin me punë të Ambasadës së SHBA-së në Sarajevë Nicholas Hill më 23 shtator për t’u ankuar për akuzat për neglizhencë dhe korrupsion të hedhura në një blog të publikuar së fundmi nga dy zyrtarë të lartë amerikanë. Lagumdzija është njëkohësisht kreu i Partisë Social Demokrate të Bosnjës.
Takimi erdhi pasi dy zyrtarë të Bosnjës përdorën një postim në blogun e ambasadës së SHBA-ve për të akuzuar politikanët për mungesë iniciative në rindërtimin e vendit pas përmbytjeve shkatërrimtare të majit. Ata i akuzuan politikanët për korrupsion dhe neglizhencë.
Ministria e Jashme publikoi një deklaratë të martën duke hedhur poshtë akuzat për korrupsion dhe keqpërdorim të parave të donatorëve.
Ajo pretendoi se asnjë lek nga donatorët e huaj “nuk është derdhur në llogaritë e asnjë institucioni të shtetit apo të entiteteve [të Federatës] dhe rrjedhimisht këto para nuk mund të jenë keqpërdorur apo përdorur për të mbushur deficitet buxhetore”.
Lagumdzija i tha Hill se pretendimet qenë të rreme, duke shtuar se donatorët duhet të jenë më të hapur se si donacionet po shpërndahen.
“Çdo njeri serioz, përfshirë zyrtarë të Bosnjës dhe të SHBA-ve, kanë detyrimin për të thënë publikisht, dhe jo të bëjnë vlerësime të përgjithshme, se cilat institucione apo cilët politikanë – me emrin e tyre të plotë – nuk kanë vepruar me transparencë,” deklaroi Ministria e Jashtme.
Zyrtarët amerikanë në Bosnjë janë akuzuar se mbështesin parti të caktuara politike në fushatën elektorale si dhe për shënjestrimin e Partisë SocialDemokrate të Lagumdzijas e cila është aktualisht në qeveri.
Ambasada e SHBA-ve tha se i qëndron postimimit në blogun e saj duke argumentuar se politikanët e Bosnjës duhet të bëjnë më shumë për t’i përgjigjur përmbytjeve shkatërrimtare.
“Qëllimi i postimit qe që të shprehnim shqetësimin tonë për mirëqënien e viktimave të cilat në përgjithësi u lanë të kujdesen për veten ndërkohë që është afruar dimri,” thuhet në deklaratë.
“Postimi ka gjeneruar shumë diskutime dhe debate nga të gjitha anët për këtë temë të rëndësishme,” shtoi Ambasada.
“Ne besojmë se estabilishmenti politik – në të gjitha nivelet, si dhe ata jashtë pushtetit – duhet të bëjnë punë më të mirë sëbashku për të trajtuar morinë e problemeve të shkaktuara nga përmbytjet historike. Ne nuk mbështesim asnjë kandidat apo parti [në zgjedhje],” deklaroi Ambasada.
Në një takim të fundit elektoral të Partisë SocialDemokrate, Lagumdzija i tha mbështetësve se dipolomatët që kritikuan qeverinë e Federadës kroatoboshnjake, të drejtuar nga kjo parti, nuk po i ndihmonin qytetarët.
“Diplomatët po pyesin se pse nuk i janë dhënë njerëzve 500 milionë euro,” tha Lagumdzija. “Ne i thamë se kjo është një gënjeshtër… dhe kujdo që thotë një gënjeshtër, ne do t’i themi në fytyrë se është një gënjeshtër dhe se ju nuk mund ta trajtoni këtë vend si një protektorat.”
Anëtarë të tjerë të kësaj partie e kanë hedhur poshtë komentin e ambasadës së SHBA-ve si punë e “diplomatëve të nivelit të ulët”.
Ndërkohë delegacioni i Bashkimit Europian në Bosnjë deklaroi të martën se Ministri i Financave Nikola Spiric e ka gabim kur thotë se Konferenca e Donatorëve e zhvilluar në korrik kishte vetëm një karakter demonstrativ.
“Pjesa e parë e donacionit – 42 milionë euro për Programin e BE-së për Rimëkëmbjen nga Përmbytjet – është aktualisht duke ardhur,” deklaroi delegacioni.
“Ai po zbatohet nga UNDP, UNICEF dhe IOM dhe po trajton nevojat e identifikuara nga Vlerësimi i Nevojave të Rimëkëmbjes së BiH. BE-ja është duke vepruar për të ndihmuar njerëzit, nuk është duuke pritur. Paratë e nënshtetasve të BE-së të dhuruara në solidaritet me BiH aktualisht janë duke rindërtuar shkolla, qendra shëndetësore, ndërtesa të pushtetit vendor apo qendra të kujdesit shoqëror,” shtoi delegacioni.
“Këto para po ndihmojnë familjet më të dobëta të rindërtojnë shtëpitë e tyre. Po ndihmon për të rifilluar aktivitetin ekonomik vendor.”
Spiric, një anëtar i njërës prej partive në pushtet në Republikën Srbska pati pretenduar se Brukseli “po pret rezultatin e zgjedhjeve para se të ndihmonte Bosnjën.”
