Një ligj që pritet të bëjë shumë më të lehtë për qytetarët dhe gazetarët marrjen e informacionit publik ndërsa ngarkon qeverinë me një numër detyrimesh për transparencën.
Ligji i ri “Për të drejtën e informimit” i miratuar në Kuvendin e Shqipërisë shtatorin e kaluar, u publikua sot në fletoren zyrtare.
Ligji i ri, vendos për herë të parë gjoba për zyrtarët që refuzojnë të japin informacionin e kërkuar, heq procedurat burokratike të kërkimit të informacionit dhe kufizon afatin ligjor brenda të cilit autoritetet duhet t’i përgjegjen kërkesave për informim.
Për më tepër, ligji i ri ngarkon institucionet publike me një listë të gjatë publikimesh periodike për llogari të transparencës.
“Kjo reformë më në fund e sjell ligjin për të drejtën e informimit në një nivel me legjislacionin e përparuar të rajonit dhe më tej. Ajo që mbetet për të parë është nëse reforma ligjore do t’i japë fund edhe letargjisë së klasës sonë politike në fushën e transparencës.” u shpreh Darian Pavli, drejtor programi pranë Open Society Justice Initiative.
Procesi i ndryshimit të ligjit “Për të drejtën e informimit” daton qysh prej vitit 2007, rezultat i bashkëpunimit ndërmjet Open Society Justice Initiative dhe Qendrës për Zhvillimin dhe Demokratizimin e Institucioneve (QZHDI).
Andi Dobrushi, drejtor ekzekutiv i Fondacionit Soros, thekson se, ky proces vlen si histori suksesi e bashkëpunimit të gjithë aktorëve të shoqërisë civile që bënë të mundur lobimin dhe garantuan përfshirjen e grupeve të interesit, si edhe e bashkëpunimit të treguar nga institucionet shtetërore, prej të cilëve pritet zbatimi në praktikë i ligjit.
Ligji i ri do të zgjerojë autoritetin e Komisionerit për Mbrojtjen e të Dhënave Personale duke i dhënë përgjegjësinë edhe për të drejtën e informimit. Në këtë mënyrë, ligji i ri do të ketë një autoritet përgjegjës për ta zbatuar.
Afatet për trajtimin e kërkesave për informim janë shkurtuar në dhjetë ditë si dhe kanë dhënë përkufizime më precize se kur ky afat mund të zgjatet.
Përveç institucioneve publike, ligji i ri e shtrin fushën e vet të veprimit edhe në shoqëritë tregtare ku sektori publik zotëron më shumë se gjysmën e aksioneve si dhe te kompanitë private që ushtrojnë funksione të caktuara publike si arsimi, shëndetësia, energjia, telekomunikacioni e të tjera.
Në çdo institucion publik do të krijohet një koordinator për të drejtën e informimit, përgjegjës përveç të tjerave, edhe për një listë me publikime zyrtare të detyruara për llogari të transparencës publike.
