Mes viteve 2008 dhe 2014, Prodhimi i Brendshëm Bruto i Greqisë ra me 21 për qind, ndërkohë që borxhi publik është rritur me 17 për qind pavarësisht se në vitin 2012 këtij vendi iu falën gati 60 miliardë euro borxhe.
Grekët votuan të dielën në shumicë partinë Syriza, e cila ka premtuar t’i japë fund programit të kreditorëve ndërkombëtarë për shkurtim të shpenzimeve publike të vendit. Grekët reaguan me votë duke sjellë në pushtet partinë e parë me një politikë zyrtare kundër masave të zgjidhjes së krizës përmes shkurtimit të shpenzimeve publike.
Në fakt, të dhënat e Fondit Monetar Ndërkombëtar mund të ndihmojnë për të krijuar një ide se pse grekët votuan Syrizan pasi duruan vuajtjet ekonomike për gjashtë vjet dhe patën votuar parti të qendrës përgjatë zgjedhjeve të fundit.
Prodhimi i Brendshëm Bruto i Greqisë qe 233 miliardë euro në vitin 2008 por ra në 182 miliardë euro në vitin 2013. Në vitin 2014, PBB mbeti në një vend dhe shpresat janë që këtë vit të fillojë të rritet ngadalë. Por prodhimi i brendshëm bruto i Greqisë nuk pritet të kthehet në nivelin e vitit 2008 së paku deri në vitin 2020.
Ndërkohë, borxhi publik i Greqisë u rrit nga 263 miliardë euro në vitin 2008, në 355 miliardë në vitin 2011. Në vitin 2012, kreditorët ndërkombëtarë ranë dakord të falin rreth 58 miliardë euro borxhe, gjë që e ulu borxhin publik në 297 miliardë euro në fund të atij viti. Sipas planit të Trojkës, borxhi i Greqisë pritet të arrijë kulmin në 313 miliardë euro para se të fillojë të ulet ngadalë.
Por ky skenar vështirë se do të lehtësojë krizën ekonomike për shoqërinë greke, e cila po vuan nga nivel i paprecedent papunësie. Papunësia në Greqi qe 7.7 për qind e forcës aktive punëtore në vitin 2008, por u rrit në 25.8 për qind në vitin 2014. Skenari i qeverisë së mëparshme të Greqisë dhe Trojkës së kreditorëve (FMN, BE dhe BQE), është që papunësia do të ulet ngadalë, por sërish deri në vitin 2018 vështirë se do të bjerë nën 15 për qind, një nivel gjithashtu shumë i lartë.
Tsipras ka premtuar se do të rinegociojë me trojkën për të marrë një falje të re të borxheve të Greqisë, shumica e të cilave aktualisht janë blerë nga kreditorët zyrtarë. Por pavarësisht se një pjesë e borxheve mund të falen, sërish gjasat janë të pakta që Greqia vështirë se do të jetë në gjendje të paguajë paga apo pensione siç paguante në vitin 2008 ndërsa papunësia ka gjasa do të vijojë të mbetet tepër e lartë edhe për shumë vite.
