Zyrtarët në Ballkan po peshojnë pasojat e mundshme të rezultatit të referendumit grek mbi shtetet e tyre në lidhje me paralajmërimet e thellimit të krizës të cilat mund të dëmtojnë ekonominë në rajon.
Teksa liderët politikë morën në konsideratë pasojat që do vijnë prej referendumit grek, ministri i jashtëm i Belgjikës, Didier Reynders paralajmëroi të hënën se nëse Athina largohet nga Eurozona, kjo mund të destabilizojë ekonominë në Ballkan.
“Ne nuk duhet të harrojmë se ndikimi grek në Ballkan është shumë i rëndësishëm, pasi është një nga investuesit kyç në rajon. Pasojat mund të prekin jo vetëm Ish-Republikën Jugosllave të Maqedonisë dhe Malin e Zi, por gjithashtu dhe Bullgarinë,” tha Reynders për stacionin e radios RTL.
Në referendumin e së dielës, votuesit grekë refuzuan propozimet për shtrëngime nga kreditorët e vendit – BQE, BE dhe FMN. Si rezultat, një samit emergjencë në Eurozonë është thirrur për të martën.
Banka qendrore e Maqedonisë tha megjithatë se nuk planifikon të marrë masa të reja për të mbrojtur sistemin financiar vendas. Banka javën e shkuar kufizoi rrjedhjen e kapitalit nga bankat maqedonase në Greqi.
“Ne do të monitorojmë situatën me aftësinë paguese të sektorit bankar grek dhe do të reagojmë nëse është e nevojshme,” tha guvernatori i bankës qendrore maqedonase, Dimitar Bogov.
Në Malin e Zi, banka qendrore tha javën e shkuar se analizat tregonin se vendi nuk do të preket ndjeshëm nga kriza sepse sistemi i tij bankar nuk është i lidhur ngushtë me Greqinë dhe nivelet e tregtisë së përbashkët janë të ulëta.
Kreu i komitetit parlamentar mbi ekonominë dhe buxhetin, Aleksandër Damjanovic, tha të hënën se Mali i Zi duhet të përgatitet në rast se Greqia del nga Eurozona.
Ndërkohë Bosnja dhe Hercegovina, po përballen tashmë me një krizë serioze likuiditeti pasi zyrtarët lajmëruan javën e shkuar se reformat, që u miratuan fillimisht nga BE dhe FMN nuk do të zbatohen.
Teksa monedha e Bosnjes është e lidhur drejtpërdrejt me euron, çdo luhatje e euros do të prekë vendin,” tha ekonomisti Sinisa Pepic për BIRN.
“Kjo do të përkeqësonte pozitën e borxhit të huaj, i cili është më së shumti në dollarë amerikanë dhe do të pakësonte sasinë e parave nga mbledhja e taksave dhe kontributet që shkojnë për buxhete,” tha Pepic.
Në Serbi, kryeministri Aleksandër Vuçiç nuk iu adresua direkt votimit grek por vlerësoi masat e kursimit që administrata e tij ka prezantuar dhe që e kanë bërë vendin ‘financiarisht të shëndetshëm’.
Ekonomisti serb Goran Nikoliç nga ana tjetër tha për BIRN se sistemi bankar në vend mund të përballet me probleme pasi katër banka greke kanë 15 për qind të sektorit bankar në Serbi.
Në Kroaci, shtetin anëtar në BE, zyrtarët e lartë nuk bënë komente për referendumin e së dielës. Por ish-presidenti Ivo Josipoviç tha se kishte ndasi të thella në shoqërinë greke.
“Nga kjo duhet të nxirret mësimi se shpenzimet përtej mundësive duhet të shlyhen me kalimin e kohës,” tha Josipoviç.
Ai shtoi se duhet gjetur një “gjuhë mirëkuptimi, kompromisesh dhe një rezolutë e qëndrueshme për krizën”.
