Gjykata e Apelit në Prishtinë konfirmoi burgosjen e tre burrave të dënuar për krim të organizuar në lidhje me trafikim organesh në klinikën “Medicus” në Kosovë në vitin 2008, por dy të tjerë u liruan nga akuzat.
Gjykata e apelit të enjten la në fuqi dënimet për pronarin e klinikës “Medicus”, Lutfi Dervishi, djalit të tij Arban Dervishit dhe krye-anestezistin Sokol Hajdinit, duke vendosur se ata ishin fajtorë për krim të organizuar në lidhje me trafikun njerëzor.
Lutfi Dervishi dhe djali i tij u dënuan me nga tetë vjet burg dhe Hajdini me pesë.
“Veprat penale janë kryer në klinikën “Medicus”, ku gjatë vitit 2008 janë zhvilluar transplante të shumta të paligjshme të veshkave,” thuhej në një deklaratë të gjykatës.
“Gjykata e Apelit konstatoi se edhe pse kontrolli i policisë në klinikën “Medicus” ishte i paligjshëm, ka prova të mjaftueshme se atje janë zhvilluar shtatë transplante të paligjshme veshkash,” shtoi ajo.
Megjithatë, gjykata vendosi se nuk kishte prova të mjaftueshme se ndihmës anestezistët e klinikës, Islam Bytyqi dhe Sylejman Dula, ishin të përfshirë në trafikim organesh.
Kjo rrëzon dënimet e tyre të dhëna në prill të vitit 2013, kur Bytyqi dhe Dula u shpallën fajtorë për lëndime të rënda trupore dhe u dënuan me nga një vit burg dhe u pezulluan nga puna për dy vjet.
Edhe Lutfi Dervishit iu ndalua të punojë si urolog për periudhë prej dy vitesh.
Prokurorët e EULEX-it kishin pretenduar në aktakuzë se në klinikë në vitin 2008 ishin kryer rreth 30 transplante të paligjshme veshkash.
Njerëz të varfër nga Turqia, Rusia, Moldavia dhe Kazakistani dyshohet se janë sjellë në klinikë pasi u siguruan se do të merrnin deri në 15,000 euro për veshkat e tyre.
Prokurori i EULEX-it në këtë çështje tha se marrësit e transplantit, kryesisht izraelitë, paguan më shumë se 70,000 euro për veshkat.
Policia fillimisht bastisi klinikën në vitin 2008, pasi një burrë turk, të cilit i ishte hequr veshka, u gjet i sëmurë rëndë në aeroportin e Prishtinës.
Dy të dyshuar të huaj në këtë çështje – mjeku turk Yusuf Sonmez dhe Moshe Harel, një qytetar izraelit – janë ende të regjistruar si të kërkuar nga Interpoli, por mbeten të lirë.
Klinika “Medicus” është përmendur gjithashtu në një raport të Këshillit të Evropës, i cili pretendoi se elementë të Ushtrisë Çlirimtare të Kosovës tregtuan organet e të burgosurve gjatë konfliktit të vitit 1999.
Paneli i Gjykatës së Apelit ditën e enjte përbëhej nga dy gjykatës ndërkombëtarë dhe një gjykatës vendas.
