I dërguari i posaçëm gjerman për Maqedoninë, Johannes Haindl, që mbërrin në Shkup të enjten, pritet të prezantojë disa kërkesa kyçe për politikanët maqedonas si pjesë e zgjedhjes së krizës.
Gjatë dy ditëve në Maqedoni, i dërguari gjerman i cili është gjithashtu ambasadori gjerman në Austri do të takohet me krerët e katër partive kryesore në Maqedoni, si dhe ambasadorët e vendeve anëtare të BE-së dhe SHBA-ve, lajmëroi ambasada gjermane në Maqedoni.
Ai nuk do të takohet me presidentin e Maqedonisë Gjorge Ivanov falja e të cilit shihet si shkak i përkeqësimit të krizës politike në vend.
Media ka raportuar duke cituar burime të paidentifikuara të afërta me bisedimet se Haindl do të ngrejë tre kërkesa kryesore.
Njëra është që të tërhiqet falja presidenciale e 12 prillit për politikanët e lartë dhe bashkëpunëtorët e tyre, e cila ka bllokuar në mënyrë efektive punën e Prokurorisë Speciale, e formuar vitin e kaluar për të hetuar krimin e nivelit të lartë dhe që ka nxitur protesta masive anti-qeveritare.
Kërkesa e dytë është për të shtyrë zgjedhjet e parakohshme, të cilat partia në pushtet VMRO-DPMNE e udhëhequr nga Nikolla Gruevski insiston të mbahen më 5 qershor.
Ndërsa VMRO-DPMNE ka dorëzuar listën e kandidatëve për deputetë brenda afatit të mesnatës, të mërkurën, tre partitë e tjera kryesore – të cilat refuzojnë datën e votimit në qershor, nuk i kanë dorëzuar listat.
E treta kërkesë ka të ngjarë të nxjerrë në pah shqetësimet për mbrojtjen e integritetit të Gjykatës Kushtetuese, të cilen shumë e shohin si nën ndikimin e Gruevskit dhe që është nën presion për të hequr Prokurorinë Speciale, si antikushtetuese.
Një burim tha se kjo mund të bëhet duke kërkuar që gjykata ta shpallë veten jokompetente për të vendosur mbi këtë çështje.
Raportet e medias thonë se bisedimet me liderët e partive do të fokusohen në formimin e një qeverie të re të përkohshme që do të rinovojë përpjekjet për të pastruar listën zgjedhore, për të kryer reformat e medias që të sigurohet ekuilibri në raportim dhe të vënë në vend punën për reformat e tjera si mungesa e presionit politik mbi votuesit dhe mos shpërdorimi i aseteve shtetërore për qëllime politike, të gjitha këto para se të vendoset një datë e zgjedhjesh.
Kriza në Maqedoni sillet rreth pretendimit të opozitës se qeveria e kryesuar dikur nga Gruevski ishte përgjegjëse për përgjimin e paligjshëm të mbi 20.000 njerëzve, mes krimesh të tjera.
Gruevski, i cili mori pushtetin në vitin 2006 dhe dha dorëheqjen si kryeministër në fillim të këtij viti sipas kushteve të një marrëveshje të ndërmjetësuar nga BE të arritur verën e kaluar, thotë se akuzat janë instaluar nga shërbime të huaja për të destabilizuar vendin.