Ish-lideri i rebelëve serbë të Kroacisë, Goran Haxhiç, gjyqi i të cilit për krime lufte, u pezullua për shkak se ai vuante nga tumori në tru, vdiq në qytetin serb të Novi Sadit në moshën 57-vjeçare.
Haxhiç, i cili vuante nga një tumor i trurit dhe ishte liruar nga paraburgimi nga gjykata e OKB-së në Hagë për shkak të shëndetit të tij të keq, vdiq në një spital në Novi Sad të martën në mbrëmje.
Agjencia e lajmeve Tanjug raportoi që spitali të kish thënë se shëndeti i tij ishte “përkeqësuar ndjeshëm në dy muajt e fundit dhe se ai e kaloi shumicën e asaj kohe në spital, ku edhe vdiq”.
Haxhiç ishte në gjyq në Tribunalin Penal Ndërkombëtar për ish-Jugosllavinë, i akuzuar për krime kundër njerëzimit dhe shkelje të ligjeve dhe rregullave të luftës në Kroaci nga viti 1991 deri 1993.
Gjatë konfliktit, ai ishte presidenti i vetëshpallur i Qarkut Autonom Serb të Sllavonisë, Baranjës dhe Sremit Perëndimor, dhe më pas u bë president i Republikës Serbe Krajina – të dyja zona rebele të kontrolluara nga serbët, por të panjohura, brenda Kroacisë.
Haxhiç, i cili ishte i arratisuri i fundit i kërkuar nga Tribunali i Hagës për t’u arrestuar, u kap në Serbi në vitin 2011 pas më shumë se shtatë vitesh arrati.
Gjyqi i tij u ndërpre vitin e kaluar, pasi ai u diagnostikua me kancer të trurit dhe u shpall i paaftë të paraqitet në gjykatë.
Haxhiç u lind në vitin 1958 në qytetin kroat të Vinkovcit, i cili në atë kohë ishte pjesë e Jugosllavisë komuniste. Deri në shpërbërjen e Jugosllavisë, ai punoi si një magazinier në një fabrikë në qytetin e afërt të Vukovarit.
Pasi konflikti u përhap në të gjithë vendet e ish-Jugosllavisë, Haxhiç u shfaq si një lider i serbëve lokalë në Kroaci.
Ai së pari u bë këshilltar në Vukovar dhe pastaj në vitin 1991 u bë president i këshillit komunal në qytet.
Ndërsa ishte de facto lider vendas në Vukovar, qyteti u bombardua dhe u rrafshua nga forcat e Beogradit, dhe pothuajse të gjithë kroatët u dëbuan prej vendit.
Në vitin 1992 dhe 1993, ndikimi i tij u përhap në mesin e serbëve lokalë në Kroaci dhe më pas ai u bë president i Republikës Serbe Krajina, RSK, një mini-shteti i vetëshpallur serb në Kroaci.
Sipas prokurorisë të Tribunalit të Hagës, si president i RSK ai mori pjesë në një organizatë të përbashkët kriminale që kishte si qëllim largimin me forcë dhe përgjithmonë të kroatëve dhe jo-serbëve nga pjesë të territorit të Kroacisë, në mënyrë që territori mund të bëhej pjesë e një shtet i ri të dominuar nga serbët.
Prokuroria pretendoi se, përveç Haxhiç, pjesëmarrësit e tjerë në organizatën kriminale ishin, ndër të tjerë, Sllobodan Millosheviç, lideri i Partisë Radikale Serbe, Vojisllav Sheshel dhe shefi paramilitar Zeljko Raznatoviç, i njohur si Arkan.
Rasti i tij ishte një nga tre çështjet e mbetura në proces në Gjykatën e Hagës para se kjo të mbyllet. Ai ishte gjithashtu i pandehuri i shtatë i cili vdiq para se të merrej një vendim.
