Refugjatët që kanë mbetur në zonën transit me Serbisë dhe Hungarisë përballen me kushte të përkeqësuara teksa vjeshta po afron, paralajmërojnë aktivistët.
Megjithëse Serbia po shton kapacitetet e saj të pranimit të refugjatëve, ata që presin për leje që të hyjnë në Hungari në një zonë transit pranë Kelebija përballen me pritje të gjatë, mot të përkeqësuar dhe kushte të këqija, thonë aktivistët.
“Me pikën e parë të shiut, strehat provizore në zonën e transitit duhet të riparohen dhe nuk ka mjaftueshëm ndërtesa të higjienës. Policia gjithashtu nuk na lë të hyjmë në zonë dhe të ndihmojmë refugjatët,” tha për BIRN të hënën Karl Schott, një vullnetar humanitar nga organizata “Unë jam Njeri”.
Ai tha se një numër i madh refugjatësh nuk duan të shkojnë në kampe refugjatësh ngaqë kanë frikë se mund të humbin pozicionin “në radhën” për të hyrë në Hungari dhe më pas në BE.
“Jam në krye të listës [për hyrjen në BE] për grupin tim. Në këtë grup që pret të hyjë [30 persona në ditë] do të jemi në radhë për një muaj. Situata për të tjerët është edhe më e keqe, ata mund të presion në grup për më shumë se 100 ditë. Megjithatë, ne nuk duam të largohemi [në kampe] dhe të humbim vendet tona,” tha për BIRN Ahmad Abu Hamood një refugjat sirian.
Personat në zonën transit u shtuan në mes të korrikut pasi Hungaria forcoi kontrollet kufitare, duke ndërprerë atë pjesë të itinerarit të Ballkanit. Që nga korriku Hungaria ka lejuar të hyjnë vetëm 15 refugjatë në ditë në kufirin me Serbinë.
“Ndihma humanitare i ofrohet refugjatëve në zonën transit, megjithatë, nuk mjafton. Gjithashtu, një problem është se policia nuk po lejon të hyjnë refugjatët në qytetin Kelebija që të mund të blejnë gjëra vetë,” tha Schott.
Ndihmës Komisarja serbe për Refugjatët dhe Migracionin, Danijela Popoviç Roko, të hënën tha se Serbia po zgjeronte kapacitetet e saj për refugjatët dhe po përgatitej për dimrin.
“Ne kemi numëruar jo më shumë se 6000 refugjatë që qëndrojnë në Serbi apo thjesht që kalojnë,” tha Popoviç Roko, që shtoi se aktualisht gjenden 4000 refugjatë në Serbi.
Ajo tha se Serbia po pret që më tepër refugjatë të qëndrojnë më gjatë tani që itinerari ballkanas është ndërprerë dhe tani që vendet e BE-së në kufi me Serbinë kanë vënë kuota mbi refugjatët që hyjnë në territoret e tyre.
Aktualisht, pesë kampe refugjatësh operojnë në Serbi në Krnjaca pranë Beogradit, në Sjenica, Tutin, Bogovadja dhe në Banja Koviljaca, si dhe ka disa streha transit.
Popoviç Roko tha se shumica e refugjatëve qëndrojnë vetëm për pak kohë në Serbi, ngaqë synimi i tyre është të arrijnë në një nga shtetet e Bashkimit Europian dhe shumë prej tyre nuk duan të shkojnë në kampe refugjatësh.
