Ish-agjenti britanik i MI6 dhe eksperti i konflikteve Alastair Crooke tha në Beograd se Europa duhet të përgatitet për një valë të re refugjatësh dhe për shtim të politikave populiste.
Ish-diplomati i BE-së, agjent i MI6 dhe themelues i Forumit të Konflikteve, Alastair Crooke i tha BIRN në një intervistë që valët e refugjatëve “do të vazhdojnë të vijnë” në Europë – dhe se rezultat i kësaj do të jetë rritja e valës së populistëve politikë në të gjithë Europën.
Ai tha se konflikti i intensifikuar i Lindjes së Mesme nënkupton se refugjatët do të vazhdojnë të vijnë në Europë dhe kjo e fundit do të hasë vështirësi me krizën.
Sipas tij, BE-ja nuk mund ta zgjidhë në mënyrë efektive këtë krizë ngaqë vendimet e saj merren “në mënyrë burokratike, ose shumë ngadalë ose shumë shpejt”.
“Edhe nëse dhuna [në Siri dhe gjetkë] ndalon, gjithnjë e më shumë njerëz do të vazhdojnë të vijnë në Europë. Nuk ka perspektivë të rikuperimit ekonomik për ato rajone, ndaj njerëzit do të vazhdojnë të lëvizin,” tha ai për BIRN.
Problemi nuk ishte vetëm lufta në Siri, shtoi ai, por edhe rënia e çmimit të naftës nga e cila varet shumë ekonomia e Lindjes së Mesme.
“Një problem është se [rënia] e çmimit të naftës… po dëmton shtetet në ato pjesë të botës. Në këtë pikë, njerëzit nuk shohin dritë në fund të tunelit ekonomik,” tha ai.
Crook tha se efektet pas krizës ekonomike që tronditi botën në vitin 2008, po ndihen ende dhe duhet të shihen si shenjë e “shkatërrimit të ekonomisë neo-liberale”.
Megjithatë, vendet e Ballkanit sipas tij kanë qenë të izoluara prej këtyre goditjeve deri në një farë pike, vuri në dukje.
“Ato vende që kanë qenë të izoluara nga rrjedhja globale e parave, kanë ndjerë efektin minimal të krizës. Ballkani duhet parë nga kjo perspektivë gjithashtu,” tha ai.
“Të gjithë janë të prekur, por sa më pak të jesh pjesë e sistemit global, më së pak dëmtohet sistemi lokal,” shtoi ai.
I pyetur në lidhje me përpjekjet e Serbisë për t’u balancuar midis BE-së dhe Rusisë, Crooke tha se Serbia e ka vënë re se BE-ja është në krizë dhe nuk mund t’i përgjigjet në mënyrë të përshtatshme shumë sfidave aktuale.
“Liderët e Serbisë, por edhe vendet e tjera në rajon, po shohin se ku mund të mbështeten në të ardhmen,” tha ai duke shtuar se lidhjet e ngrohta të Serbisë me Rusinë duhet të shihen nga kjo perspektivë.
Crooke tha gjithashtu se rritja e mëtejshme e politikës populiste është diçka që duhet të pritet në nivel global, por edhe në Ballkan ku elitat politike janë shkëputur nga votuesit.
“Njerëzit nuk besojnë më te partitë politike, veçanërisht te ato në qendër të spektrit politik. Klasa politike është shkëputur nga thelbi i partive, duke lënë një boshllëk”, tha ai.
Sipas Crooke, forma të reja të radikalizmit politik mund të shihet në të gjithë Europën.
“Për shembull, UKIP [parti anti-BE në Britani] quhet parti populiste, ajo vetëm sa po shpreh pikëpamjet e njerëzve. Njerëzit po vuajnë nga varfëria, ata ndihen të shpërfillur nga elitat e tyre politike dhe për këtë arsye po kthehen nga këto lloj organizatash politike,” tha ai.
Crooke ka qenë këshilltar për Lindjen e Mesme për shefin e politikës së jashtme të BE-së Havier Solana nga viti 1997 deri në vitin 2003. Ai është një figurë kontraverse, sidomos në qarqet pro-Izraelite të të djathtës, pasi ka promovuar dialogun me lëvizjen Hamas në Palestinë.
Një nga qëllimet e Forumit të Konflikteve, që ai ka themeluar, është hapja e komunikimeve me lëvizjet radikale në Lindjen e Mesme si Vëllazëria Myslimane, Hamasi dhe të tjerë.
