Ministrja Kodheli lajmëroi të hënën se Shqipëria do të dërgojë trupa në Irak në kuadër të një koalicioni global kundër Shtetit Islamik.
Trupat shqiptare do të shkelin sërish në Irak, nëntë vite pas operacionit të tyre të fundit, si pjesë e operacioneve vullnetare globale anti-ISIS si përgjigje ndaj një kërkese të qeverisë amerikane.
Iniciativa u lajmërua të hënën nga ministrja e mbrojtjes Mimi Kodheli, gjatë një seance në një komision parlamentar.
“Do të sjellim në parlament shumë shpejt një projektligj për t’i hapur rrugën pranisë së ushtarëve [shqiptarë] në një koalicion global kundër ISIS,” tha Kodheli.
Projektligji pritet të dërgohet në parlament në dy javët e ardhshme me detaje të numrit të saktë të ushtarëve që do të dërgohen në bazat në Irak dhe mënyrës se si ata do të ndihmojnë në luftën kundër ISIS. Gjithashtu do të detajohet misioni që trupat shqiptare do të bëjnë në tokën irakiane.
“Ky nuk është një mision i NATO-s dhe ka nevojë për një ligj të veçantë. Po flasim rreth një misioni vullnetar në të cilin Shqipëria ka ndihmuar tashmë në mënyra të ndryshme, por jo me prani ushtarake,” shpjegoi Kodheli në komision.
Shqipëria ishte një nga vendet e para që iu bashkua Koalicionit Global kundër ISIS që u formua në shtator 2014. Kryesuar nga SHBA, koalicioni ka gjithsej 68 vende.
Përveç fushatës ushtarake në Irak dhe Siri, koalicioni është i angazhuar në sulmin ndaj financimit të ISIS dhe infrastrukturës së tij ekonomike, në parandalimin e valës së luftëtarëve të huaj terroristë dhe në mbështetjen për restaurimin e shërbimeve publike në zonat e çliruara tashmë nga sundimi i ISIS. Koalicioni gjithashtu lufton propagandën e ISIS.
Si pjesë e koalicionit, në 2014 Shqipëria dhuroi katër transhe armësh dhe municionesh te forcat kurde peshmerga në Irakun verior në mbështetje të luftës së tyre kundër ISIS.
Shqipëria është gjithashtu e angazhuar në luftimin e islamizmit radikal në atdhe. Në 2015, u miratua një Strategji kombëtare Kundër Ekstremizmit të Dhunshëm.
Vendi ballkanik, i cili u anëtarësua në NATO në 2009 ka eksperiencë në terren në Irak dhe Afganistan pasi ka vepruar nën koalicione të udhëhequra nga aleanca më parë.
Në korrik 2002, një kontingjent i forcave të armatosura shqiptare u bë pjesë e Forcës Ndërkombëtare të Ndihmës së Sigurisë në Kabul, udhëhequr nga NATO, dhe vazhdoi ta rrisë gradualisht rolin në detyrat e ndryshme në Afganistan. Rreth 2944 trupa ushtarake morën pjesë në këtë operacion.
Në prill 2003, ushtria shqiptare u angazhua si pjesë e forcave të koalicionit në Operacionin e Lirimit të Irakut në Mosul dhe Bagdad. Rreth 1377 trupa u angazhuan në Irak deri në 2008 kur trupat u tërhoqën.
