Anëtarët e PS-së në komisionin e Ligjeve njoftuan se vetëm tre nga 7 kandidaturat plotësonin kriteret për të zënë përkohësisht postin e Prokurorit të Përgjithshëm. Opozita ka kontestuar procesin si antikushtetues.
Kundërshtimi i opozitës dhe paralajmërimi i protestave prej saj nuk i ndaloi deputetët e Partisë Socialiste në Komisionin e Ligjeve të procedonin me selektimin e kandidatëve për Prokuror të Përgjithshëm të Përkohshëm.
Deputeti i PS-së në këtë komision, Bledi Çuçi tha të premten se katër prej 7 kandidatëve nuk plotësonin kriteret ligjore, ndërsa tre të tjerët, që sipas komisionit i plotësojnë këto kritere do të kalojnë në votim të hënën.
Opozita e cila më herët bojkotoi seancën dëgjimore me kandidatët mungoi edhe në këtë seancë. Në mungesë të saj, shumica shpalli si kandidatë të mundshëm për Prokuror të Përgjithshëm të Përkohshëm, Arta Markun, prokurore në Shkodër, Ermira Tafanin, prokurore në Elbasan dhe Ferdinand Elezi, prokurori i Apelit në Durrës.
Sipas anëtarëve të PS-së në këtë komision, të tre këta kandidatë plotësojnë kriteret ligjore. Ndërkohë 4 kandidatët e tjerë janë skualifikuar. Arqile Koça u përjashtua sepse nuk kishte gradën shkencore, Granit Shahu dhe Besnik Muçi nuk përmbushin vjetërsinë në punë, ndërsa Artur Selmani sepse kishte një masë disiplinore dhe është vlerësuar si “jo kalues” nga ILDKPI.
Opozita ndërkohë ka zgjedhur të jetë jashtë procesit, ndërkohë që kreu i PD, Lulzim Basha akuzoi kryeministrin se po synonte marrjen nën kontroll të institucioneve të drejtësisë duke shkelur kushtetutën dhe me qëllim mbylljen e dosjeve hetimore.
Përplasja mes palëve politike për zgjedhjen e këtij prokurori ishte e parashikueshme, pas vonesave në ngritjen e Këshillit të Lartë të Prokurorisë për shkak të mungesës së kandidatëve nga shoqëria civile. Ndërkohë, mbarimi i mandatit të Adriatik Llallës në fillim të këtij muaji i ka vënë palët politike mes dy zgjedhjeve. Socialistët që synojnë largimin e tij dhe demokratët dhe LSI që janë në favor të qëndrimit të tij në zyrë deri në zgjedhjen e pasuesit përmes Këshillit të Lartë të Prokurorisë.
“Siç është konstatuar nga të gjithë ekspertët, sa kohë një kryeprokuror i ri nuk është zgjedhur apo emëruar, kryeprokurori në detyrë do të vazhdojë ta mbajë detyrën,” tha kreu i PD Lulzim basha në një takim me gazetarët, duke këmbëngulur se zgjedhja e prokurorit të ri duhej të bazohej në kushtetutë.
Ndërkohë nga ana e tyre, socialistët këmbëngulin se në bazë të dispozitës kalimtare në ligjin për Prokurorinë, Kuvendi ka të drejtë të zëvendësojë Llallën me një prokuror që zgjidhet me shumicë të thjeshtë.
