Instituti i Statistikave bëri të ditur se rritja vjetore e Prodhimit të Brendshëm Bruto u ngadalësua në tremujorin e tretë 2017 në 3.55% nga 4.09 që ishte në tremujorin e dytë, e penguar nga kriza elektroenergjetike e vjeshtës.
Rritja ekonomike për periudhën korrik-shtator 2017 u ngadalësua në 3.55% në bazë vjetore, norma më e ulët e rritjes e shënuar që nga tremujori i katërt i vitit të kaluar, e shkaktuar në veçanti nga thatësira dhe rënia e prodhimit të energjisë elektrike nëpër hidrocentrale, njoftoi Instituti i Statistikave. [Link]
” Negativisht kanë kontribuar aktivitetet Industria, Energjia dhe Uji me -0,12 pikë përqindje dhe Pasuritë e paluajtshme me -0,02 pikë përqindje,” bëri të ditur INSTAT.
Rritja ekonomike e Shqipërisë përgjatë viteve të fundit është ushqyer para së gjithash nga aktiviteti i ndërtimit, i lidhur me dy investime të mëdha të huaja, gazsjellësi TAP dhe hidrocentralet mbi lumin Devoll.
“Aktiviteti i Ndërtimit pati rritje me 7,64 %, influencuar kryesisht nga investimet private të lidhura me TAP, si edhe nga kompanitë që bëjnë vepra publike,” thotë INSTAT.
Fondi Monetar Ndërkombëtar parashikon rritje ekonomike në masën 3.7 për qind për Shqipërinë për vitin 2017. Qeveria shqiptare beson se rritja këtë vit do të jetë 3.8 për qind. Vlerësimi paraprak i INSTAT është afërsisht në të njëjtat nivele. Por ky është vetëm vlerësimi paraprak. INSTAT kryen tre matje të PBB-së, vlerësimin paraprak, i cili përfundon tre muaj pas mbylljes së periudhës së matur, vlerësimin gjysmë final, i cili mbyllet afro një vit pas si dhe dhe vlerësimin final, i cili kërkon tre vjet. Përgjatë historisë së re të Shqipërisë, INSTAT në mënyrë të përsëritur ka rezultuar se mbivlerëson rritjen ekonomike në vlerësimin fillestar ndërsa vlerësimet e mëpasme mbartin pothuajse gjithmonë rishikime në rënie.
