Pasi presidenti i Serbisë, Aleksandër Vuçiç, anuloi takimin e tij të planifikuar me homologun e tij të Kosovës, BE-ja po planifikon një takim të ri midis dy liderëve pas një përkeqësimi të papritur të marrëdhënieve.
BE-ja tha se po planifikonte një takim të ri të përbashkët midis presidentit serb Aleksandër Vuçiç dhe Hashim Thaçit të Kosovës, pasi Vuçiç anuloi të premten në Bruksel takimin e tij të lajmëruar me Thaçin, duke lënë në dyshim edhe vizitën e tij të ardhshme në Kosovë.
“Vështirësitë mbeten,” tha shefja e politikës së jashtme të BE-së, Federica Mogherini, pasi mbajti takime të ndara me Vuçiçin dhe Thaçin të premten në mëngjes.
Ajo shtoi se kishte besim te angazhimi i plotë i të dy presidentëve për të vazhduar procesin e dialogut të udhëhequr nga BE-ja dhe “të arrihej në muajt e ardhshëm një marrëveshje ligjërisht detyruese për normalizimin e plotë të marrëdhënieve, në përputhje me të drejtën ndërkombëtare”.
Mogherini njoftoi se do të thërrasë sesionin e ardhshëm të nivelit të lartë të dialogut përpara Javës Ministrore të Asamblesë së Përgjithshme të OKB-së në javën e fundit të shtatorit, “për të bashkuar të dyja palët që të përparojnë me punën mbi përmbajtjen e marrëveshjes”.
Kosova shpalli pavarësinë nga Serbia në vitin 2008. Serbia u zotua të mos e njohë kurrë atë. Megjithatë, presioni ndërkombëtar po rritet ndaj të dy vendet për të zgjidhur mosmarrëveshjen prej një dekade, nëse ata duan të sigurojnë një të ardhme si pjesë të BE-së.
Presidenti serb e befasoi publikun pasi anuloi takimin e planifikuar me Thaçin, pasi mbajti një takim dypalësh me Mogherinin.
Edhe pse Vuçiçnuk bëri asnjë deklaratë, Shefi i Zyrës së Serbisë për Kosovën, Marko Djuriç, tha se Vuçiç kishte informuar Mogherinin për “të gjitha gënjeshtrat e Prishtinës gjatë ditëve të kaluara” dhe shtoi se kjo “është arsyeja pse ai nuk do të takohet me delegacionin e Kosovës sot”.
Pas njoftimit të mediave se Vuçiçi kishte anuluar takimin, Thaçi tha se ata kishin rënë dakord të dy që takimi trepalësh nuk do të zhvillohej.
“Ka pasur një marrëveshje mes meje dhe Vuçiçit për të kapërcyer këto mosmarrëveshje në ditët dhe javët që do të vijnë me mirëkuptimin e delegacioneve dhe me ndihmën e Bashkimit Europian,” tha ai.
Thaçi vuri në dukje se mosmarrëveshjet e mëdha midis Kosovës dhe Serbisë po ndikonin të dyja palët drejt një faze reflektimi përpara vazhdimit të mëtejshëm.
Kryeministrja e Serbisë, Ana Brnabiç, në një njoftim për shtyp, i bëri thirrje komunitetit ndërkombëtar “të kuptojë seriozitetin e situatës në Kosovë”.
“Do të doja që komuniteti ndërkombëtar të mos vërë në provë durimin apo mirëkuptimin tonë, por të kuptojmë seriozitetin e situatës dhe të veprojë në përputhje me rrethanat,” tha Brnabiç.
Ajo e akuzoi Kosovën se ishte “e papërgjegjshme, e paparashikueshme dhe nuk respektonte marrëveshjet e arritura dhe marrëveshjet e nënshkruara”.
Më 19 prill 2013, një marrëveshje e jashtëzakonshme, e cila renditi pika të negociatave, u nënshkrua në Bruksel nga përfaqësuesit serbë dhe ata të Kosovës.
Që atëherë, të dyja palët kanë akuzuar njëra-tjetrën se nuk po e respektojnë atë.
Anulimi i takimit me Thaçin ka vënë në dyshim edhe vizitën e paralajmëruar të Vuçiçit në Kosovë.
Ai do të vinte në Kosovë këtë fundjavë për të prezantuar “udhëzimet dhe orientimet e politikës shtetërore të Serbisë ndaj Kosovës”.
Ministri i jashtëm i Kosovës Behgjet Pacolli konfirmoi për BIRN se Kosova nuk do të lejojë që Vuçiç të vizitojë liqenin e Gazivodes në Kosovë gjatë qëndrimit të tij.
Megjithatë, Djuriç tha se nëse Vuçiç shkon në Kosovë, “ai me siguri do të vizitojë liqenin e Gazivodes”.
Ministri i mbrojtjes i Serbisë, Aleksandar Vulin, ndërkohë tha se “çdo urdhër nga presidenti serb do të vihet në zbatim”.
“Nëse presidenti Vuçiç vendos të vizitojë Kosovën dhe Metohinë, vizita do të jetë e sigurt dhe sipas një plani të miratuar nga presidenti Vuçiç. Siguria e tij do të garantohet nga autoritetet në Kosovë dhe Metohi ose ne (Ushtria Serbe) do ta bëjmë atë,” tha ai në një njoftim për shtyp.
Por Thaçi tha se Vuçiç do të duhej të ndiqte itinerarin e miratuar.
“Ne jemi një vend i pavarur dhe sovran. Do të respektohet itinerari i lejuar për vizitën e presidentit serb në republikën e Kosovës. Asgjë më shumë ose më pak. Ne i respektojmë të gjithë, nuk duam të poshtërojmë asnjë, por nuk lejojmë shkeljen e sovranitetit të republikës së Kosovës,” tha ai.
Raportet e mediave thanë se presidenti serb do të merrte një vendim përfundimtar për vizitën e tij në Kosovë të premten në mbrëmje.
