Përgjatë të gjithë muajit shtator, pavarësisht se Banka e Shqipërisë zyrtarisht vijon ndërhyrjen e saj të jashtëzakonshme kundër forcimit të lekut, monedha kombëtare ka vijuar të forcohet, ndërsa euro ra në 124.8 lekë të mërkurën, një nga kuotat më të ulëta në mbi dhjetë vjet.
Leku shqiptar shënoi një rekord shumëmujor të mërkurën në tregun e këmbimit valutor kur euro u shkëmbye me 124.8 lekë, sipas kursit fiks të publikuar nga Banka e Shqipërisë. Leku është forcuar ngadalë por në mënyrë të vazhdueshme që nga fillimi i shtatorit ndërsa kuota e të mërkurës është parë vetëm tre herë në fillim të qershorit pak para se Banka e Shqipërisë të fillonte blerjen masive të euros në tregun e këmbimit valutor.
Të dhënat zyrtare të Bankës së Shqipërisë tregojnë se gjatë ditëve të qershorit, BSH bleu 65 milionë euro në ndërhyrjen e saj të jashtëzakonshme përveç 63 milionëve që u blenë në ankandet e planifikuara më parë, për një total rekord prej 128 milionë eurosh. BSH i publikon të dhënat mbi ndërhyrjet në tregun e këmbimit valutor në fund të tremujorit pasardhës, si pjesë e politikës së saj të ndërhyjes në treg. Për rrjedhojë, të dhënat mbi ndërhyrjet e BSH në treg për muajt korrik, gusht e shtator pritet të bëhen të disponueshme në fund të muajit dhjetor.
Arsyet e vijimit të forcimit të lekut pavarësisht ndërhyrjeve masive të BSH janë gjerësish të debatuara, por dukshëm një nga arsyet janë prurjet e konsiderueshme të euros nga aktivitetet ilegale të shqiptarëve në vende të ndryshme Europiane. Disa ndërhyrje policore kundër krimit të organizuar gjatë këtij viti, të tilla si operacioni OAZ, që solli konfiskimin e një hoteli luksi në Velipojë, apo operacioni i pak ditëve më parë, ku të arrestuarit e dyshuar për trafik ndërkombëtar droge rezultonin pronarë të një hoteli në plazhin e Durrësit, sugjerojnë se prania e parave të pista në ekonominë shqiptare është masive. Megjithatë, fakti është që leku ka njohur forcim të dukshëm nga viti 2017 ndërsa tendenca e forcimit u përshpejtua në maj të këtij viti.
Tani pyetja që shtrohet është nëse sasia e valutës së tepërt në treg është brenda shumave që mund të menaxhohen nga politika monetare apo janë jashtë aftësive të BSH. Ndonëse banka qendrore mund të blejë euro në këmbim të lekëve, blerjet në përmasa të mëdha mund të sjellin destabilitet më shumë se sa stabilitet.
