Ambasada e SHBA përgëzoi prokuorinë dhe vlerësoi si “fitore për sundimin e ligjit” dënimin me 14 vjet burg të Emiljano Shullazit dhe personave të lidhur me të. Ndërkohë Partia Demokratike dhe kryeministri Edi Rama pretenduan merita për arrestimin dhe dënimin e tij.
Ambasada e Shteteve të Bashkuara të Amerikës në Tiranë publikoi një reagim të shkurtër pas vendimit të Gjykatës së Shkallës së Parë për Krime të Rënda për të dënuar Emiljano Shullazin, ku përgëzon prokurorinë dhe thotë se dënimi është “një hap domethënës përpara për qytetarët shqiptarë që kërkojnë dhe meritojnë drejtësi të vërtetë nga sistemi i tyre gjyqësor”.
Nga ana e saj edhe Partia Demokratike lëshoi një deklaratë për shtyp, në të cilën ajo thotë se arrestimi dhe dënimi kishin ardhur “vetëm falë denoncimit dhe betejës së pandërprerë të PD, si dhe mbeshtetjes së SHBA”. Në të njëjtën deklaratë PD këmbëngul se vecc Shullazit duhej të ishin dënuar edhe deputeti i PS Jurgen Ccyrbja, ish-ministri i Brendshëm Saimir Tahiri dhe kryeministri Edi Rama.
Po ashtu në reagimin e saj PD e cilësoi të paplotë dënimin, duke vënë në dukje se shumë krime të tjera të bandës ishin të pazbardhura. PD pretendoi se dënimin do të kishte qenë më i rëndë nëse Shullazi nuk do kishte pasur mbështetjen e qeverisë së partisë Socialiste.
Ky i fundit në emisionin Relapolitix në Report.tv përmendi Shullazin si kundër argument pikërisht për të rrëzuar akuzat e PD-së. “U fol për këtë Shullazin, Shullazi, Shullazi, sot ai dënohet 14 vite burg. Tani këtë e krijuam ne? Apo ishte i kudondodhur dhe i plotfuqishëm? Kush e arrestoi? Kush e mbajti brenda? Kush e bëri të mundur që të dënohej? Ata që na e ngjitën ne?”, tha Rama duke pretenduar se nuk ia dinte emrin të dënuarit. Kryeministri po ashtu pretendoi se krimi i organizuar kishte “bërë pallë” para se PS të vinte në pushtet.
Emiljano Shullazi u dënua të martën nga Gjykata e Shkallës së Parë për Krimet e Rënda sëbashku me katër të akuzuar të tjerë për gjobvënie dhe grup të strukturuar kriminal. Në total Gjykata dha 55 vjet burg, 14 vjet për Shullazin, 12 vjet për krahun e tij të djathtë Gilmando Danin, nga 10 vjet për Endrit Qyqjen dhe Endrit Zelën dhe 9 vjet për Blerim Shullazin. Prokuroria kishte kërkuar 64 vite burg. Ndërkohë avokatët mbrojtës pretenduan pafajësi dhe thanë pas vendimit se do ta apelonin.
Ambasada e SHBA e cila ka qenë aktive në denoncimin e disa prej figurave të botës së krimit të dyshuar se kishin përkrahje politike dhe që vëzhgoi nga afër procesin gjyqësore vlerësoi punën e prokurorisë. “Ne u inkurajuam nga puna e prokurorëve shqiptarë, të cilët, duke u bazuar në prova, bindën gjykatësit e Krimeve të Rënda se një bos i krimit dhe kriminelë të tjerë e kanë vendin në burg”, thuhet në reagimin e SHBA pas vendimit, të cilin e cilësuan “një fitore për sundimin e ligjit në Shqipëri”.
Ambasada po ashtu ishte e qartë në reagim se vendimi i të martës nuk ishte i mjaftueshëm “Qytetarët shqiptarë tani pyesin “Kush e ka radhën”?”, thuhet në reagimin e publikuar në rrjetin social. Më herët ish-ambasadori i SHBA në Shqipëri Donald Lu, pati përmendur disa herë Shullazin. Përmendja nga ambasadori u përdor nga mbrojtja e cila e cilësoi këtë si cënim të “prezumimit të pafajësisë”.
