Punonjësit e ujësjellësit të bashkisë së Selenicës protestuan para prefekturës në Vlorë, pasi nuk marrin pagat prej muajsh. Ata fajësojnë qeverinë pasi fondet për pagat e mirëmbajtjen e ujësjellësit, trasferohen në shlyerje borxhesh të ish-komunave ndaj OSHEE.
Punonjësit e Ujësjellësit të Selenicës thonë se nuk janë paguar prej 8 muajsh, ndërsa qyteti e fshatrat përballen me probleme madhore sa i përket furnizimit. Të mërkurën punonjësit e SH.A Ujësjellës Selenicë, kanë protestuar përpara prefekturës po pa arritur të takohen me zyrtarë të saj, ndërsa kanë kërcënuar me stakimin e stacioneve të pompimit.
Edhe pa arritur të fikja e stacioneve në Selenicë punëtorët thonë se situata e ujësjellësit nuk është e mirë, fshatra të tërë furnizohen vetëm një orë në ditë ndërsa shumë kanë mungesë të ujit të pijshëm me ditë të tëra. Kryetari i Bashkisë Selenicë Përparim Shametaj tha se problemi kishte filluar me reformën territoriale, ndërsa bashkia kishte trashëguar borxhe ndaj OSHEE prej dy ish-komunave.
“Ish Komunat Kotë dhe Vllahinë, kanë detyrime të prapambetura energjie 30 milion lekë, 52 milion shtuar kamatvonesat, nga të cilat janë paguar deri më tani 8 milion pra subvencioni i dy viteve”, tha Shametaj. Sipas tij kjo situatë ka penalizuar punonjësit e ujësjellësit pasi bashkia nuk ka mundësi t’i paguaj.
Bashkia thotë se subvencioni prej 4 milion lekësh në vit që ajo merr nga qeverisja qendrore shkon i gjithi për të paguar detyrimet e ish-komunave ndaj OSHEE. Kreu i Ujësjellës /Kanalizimeve të Selenicës, Gazmend Beqaj, thotë se ky fond sipas ligjit duhet të përdorej për përballimin e “kostos neto” për pagat dhe sigurimet shëndetësore të punonjësve, faturat e energjisë dhe materialet e konsumuara për kimikate. “I gjithë subvencioni shkon për energjinë, nuk i akordohet fare si fond bashkisë, pasi qysh në thesar kalon menjëherë si pagesë energjie. Ndërkohë punonjësit tanë vijojnë të punojnë në kushte të vështira dhe të papaguar. “-tha Beqaj.
Bashkia e Selenicës ka ndërkohë 15 fshtara të cilët nuk kanë ujësjellës dhe nuk ka fond për t’i ndërtuar. Nevoja për invetime serioze në ujësjellësa është një domosdoshmëri, por bashkia e konsideruar “rurale” nuk gjeneron të ardhura sa të mund të dali nga ngërçi i krijuar.
Sipas kreut të bashkisë së Selenicës, mbledhja e taksave dhe tarifave vendore mbetet një sfidë, pasi pjesa më e madhe e popullsisë së bashkisë jeton në Vlorë. Bizneset janë të paktë, kryesisht fermerë, e të ardhurat gjithashtu.
Nga ana tjetër vec furnizimit me ujë me orare të reduktuara për shumë fshatra, cilësia e tij mbetet një problem serioz. Banorët e zonës vazhdimisht kërkojnë ujë të pijshëm, pasi zona është e pasur me burime të pashfrytëzuar.
Sipas Shametaj, zgjidhja për këtë i është dërguar qeverisë. Ai thotë se problemi me furnizimi mund të zgjidhet me anë të ndërtimit të ujësjellësit në burimin e fshatit Bashaj, investim me vlerë 7 mln euro dhe që mbulon nevojat e 80% të territorit, po përballimi i kostos së ndërtimit është i pamundur nga Bashkia Selenicë, e cila për momentin nuk mundet të paguaj as pagat e punonjësve të ujësjellësit.
