Kryeministri Ramush Haradinaj tha se që vendi i tij të heqë tarifat kontroversiale ndaj mallrave serbe, Prishtina dëshiron një marrëveshje përfundimtare dhe gjithëpërfshirëse me Beogradin në lidhje me statusin e Kosovës.
Kryeministri i Kosovës Ramush Haradinaj të martën përforcoi mesazhin e tij se Prishtina dëshiron negociata bazuar në “parimet e njohjes së ndërsjellë” me Beogradin nëse ky i fundit dëshiron që të hiqen tarifat e saj 100 për qind mbi mallrat serbe.
“Është dëshira jonë që një marrëveshje gjithëpërfshirëse dhe e detyrueshme ligjore midis dy vendeve të mund të përfundohet në vitin 2019, duke çuar në njohjen reciproke dhe anëtarësimin e Kosovës në Kombet e Bashkuara,” tha Haradinaj në një letër për kryeministrat e tjerë të botës, të cilën ai e postoi në Facebook.
Të hënën, Haradinaj gjithashtu i dërgoi një letër “Pesëshes” – SHBA-së, Gjermanisë, Francës, Britanisë dhe Italisë – duke renditur kushtet për revokimin e tarifave.
Kushtet përfshinin një propozim për një konferencë ndërkombëtare të mbështetur nga SHBA-ja dhe BE-ja për të hartuar një marrëveshje përfundimtare me Serbinë.
Haradinaj tha në letër se konferenca duhet të mbahet “me qëllim arritjen e një marrëveshjeje gjithëpërfshirëse ligjore midis Kosovës dhe Serbisë për të zgjidhur të gjitha çështjet e pazgjidhura midis dy vendeve”.
Ai tha se SHBA-ja dhe BE-ja duhet të refuzojnë “çdo rishikim të kufijve aktualë të Kosovës, ose ndarje të Kosovës, ose shkëmbime territoriale të çfarëdolloj natyre”.
Një tjetër kusht i cituar nga Haradinaj në letër ishte se “çdo forme asocimi të komunave serbe në Kosovë” nuk duhet t’i jepen kompetenca ekzekutive.
Pak pasi Haradinaj publikoi kushtet e qeverisë së tij për revokimin e tarifave, partneri i tij i koalicionit Kadri Veseli, kryetari i parlamentit dhe kreu i Partisë Demokratike të Kosovës, PDK, propozoi një pezullim të përkohshëm të taksave të importit, të cilat aplikohen gjithashtu edhe ndaj importeve boshnjake.
“Taksa nuk duhet të hiqet, por të pezullohet për 120 ditë dhe gjatë kësaj periudhe duhet të vihen në fuqi disa kushte konkrete për pezullimin e saj. Dhe nëse pas 120 ditësh nuk kemi një situatë të re, ku sjelljet e Serbisë dhe Bosnjës dhe Hercegovinës ndryshojnë rrënjësisht, atëherë e njëjta taksë do të vazhdojë,” shkroi Veseli në Facebook.
Qeveria e Kosovës fillimisht vendosi një tarifë prej 10 për qind për mallrat serbe më 6 nëntor, duke cituar “sjelljen negative” të Serbisë ndaj shtetësisë së Kosovës dhe fushatës së saj ndërkombëtare kundër njohjes së Kosovës.
Vendimi për të rritur ndjeshëm këtë taksë deri në 100 për qind u morë më 21 nëntor, një ditë pasi Kosova nuk arriti të siguronte mbështetjen e dy të tretave të 192 vendeve anëtare të Interpolit për t’iu bashkuar organizatës ndërkombëtare të policisë, një dështim për të cilin ajo fajësoi lobimin serb.
Që atëherë, Haradinaj është përballur me presion ndërkombëtare për të anuluar rritjen e tarifave.
