Shyhrete Tahiri-Sylejmani, një nga viktimat e pakta të dhunës seksuale në Kosovë gjatë kohës së luftës që foli hapur për përvojën e saj të rëndë, tha se po e thyente heshtjen për të kërkuar drejtësi dhe për të treguar solidaritet me viktimat e tjera.
Shyhrete Tahiri-Sylejmani paraqiti të hënën në Prokurorinë Speciale të Kosovës për Krimet e Luftës një ankesë penale në një përpjekje për të siguruar që agresori i saj gjatë luftës 1998-99 të ndiqet penalisht.
“Sot jam këtu që ta ndaj me ju dhimbjen që kam në shpirt dhe përfaqësoj të gjitha nënat, vëllezërit dhe bijat që kanë vuajtur si unë dhe t’u jap kurajo atyre”, tha Tahiri Sylejmani në një konferencë për shtyp para ndërtesës së Prokurorisë Speciale.
” Nuk është e lehtë aspak që ta ndash dhimbjen e shpirtit, por jam këtu që të kërkoj drejtësi”, shtoi ajo.
Tahiri-Sylejmani është një nga të paktat të mbijetuara të dhunës seksuale që flet publikisht, duke ndjekur shembullin e Vasfije Krasniqi-Goodman, e cila vitin e kaluar tregoi për mënyrën se si ajo u përdhunua nga policia serbe në fshatin e saj në vitin 1999, kur ishte vetëm 16 vjeçe.
Tahiri-Sylejmani shoqërohej në konferencën për shtyp nga Feride Rushiti, drejtoresha e Qendrës Kosovare për Rehabilitimin e të Mbijetuarve të Torturës.
Rushiti theksoi se ishte e rëndësishme që viktimat e dhunës seksuale të luftës të dalin përpara dhe jo vetëm të flasin pas dyerve të mbyllura për krimet që pësuan.
“Gjatë këtyre 20 viteve ne kemi ndarë shumë histori të heshtura me këta njerëz që i mbijetuan krimeve kaq të tmerrshme, të cilat shumicën e kohës nuk janë diskutuar as brenda familjeve. Fatkeqësisht, i kemi mbajtur të fshehura edhe nga shoqëria dhe institucionet përkatëse”, tha Rushiti.
Rushiti akuzoi institucionet e Kosovës se nuk kanë dënuar askënd që ka kryer krime dhune seksuale gjatë kohës së luftës.
“Pa drejtësi nuk ka paqe për të mbijetuarit e dhunës seksuale gjatë luftës”, tha ajo.
Intervista televizive e Krasniqi-Goodman vitin e kaluar për rastin e saj u vlerësua si hapje e diskutimit për çështjen e dhunës seksuale gjatë luftës nga forcat serbe në Kosovë.
Krasniqi-Goodman dëshmoi gjithashtu në një komitet për çështje të jashtme të Kongresit Amerikan në Uashington në fillim të këtij viti, duke i bërë thirrje SHB-së “të adresojë ndëshkimin për krime lufte dhe abuzime” duke ndihmuar në kërkimin e drejtësisë për viktimat.
Nuk ka statistika të verifikuara për numrin e viktimave të dhunës seksuale të shkaktuar nga forcat serbe gjatë luftës në Kosovë.
Një total prej 400 grash dhe 12 burrash kanë statusin zyrtar të viktimës së dhunës seksuale të kohës së luftës në Kosovë.
Një raport i Amnesty International i botuar në 2017 tha se vetëm disa nga personat e akuzuar për përdhunime gjatë luftës janë ndjekur penalisht.
