Ish-kryeministri Ramush Haradinaj po e bën të qartë se do të dëshironte të pasonte Hashim Thaçin si president, teksa ky i fundit po përballet me një aktakuzë për krime lufte që mund ta detyrojë atë të japë dorëheqjen para përfundimit të mandatit.
Ish-kryeministri i Kosovës Ramush Haradinaj po promovohet si presidenti i mundshëm i ardhshëm i Kosovës pasi partia e tij e autorizoi atë të mërkurën që ta përfaqësojë atë në diskutime me partnerët e saj të koalicionit për një riorganizim të mundshëm dhe në lidhje me kush duhet të jetë presidenti i ardhshëm.
Në një njoftim për shtyp, këshilli drejtues i Aleancës për Ardhmërinë e Kosovës, AAK, tha se “kishte autorizuar kryetarin e partisë Haradinaj që të zhvillojë çdo bisedim në emër të Aleancës për rikonfigurimin eventual të qeverisë, përfshirë këtu edhe çështjen e presidentit nëse kjo vjen në rend të ditës”.
“Këshilli Drejtues po ashtu ka kërkuar me shumicë, që në këto bisedime, kandidat për president të jetë Haradinaj”, shtoi ai.
Në Facebook, Haradinaj tha se ndjehej i nderuar nga vendimi i partisë për t’ia besuar atij këtë qëllim. “Besimin që unë të jem kandidat për president, nëse kjo diskutohet në bazë të kushtetutës, e konsideroj si përgjegjësi të lartë dhe nder të veçantë”, shkroi ai.
Ardian Gjini, një nënkryetar i AAK-së, tha se aktakuza e ngritur nga Zyra e Prokurorit të Specializuar në Hagë kundër presidentit aktual Hashim Thaçi për krime lufte të dyshuara se janë kryer gjatë luftës për pavarësi të viteve 1990 ishte një arsye për nevojën për të diskutuar një president të ri.
Thaçi tashmë ka thënë se ai do të japë dorëheqjen nëse konfirmohet aktakuza. Mandati i tij aktual përfundon më 22 prill.
Por Gjini shtoi se çështja e presidencës duhej të diskutohej së shpejti, edhe nëse sikur aktakuza kundër Thaçit konfirmohet ose jo.
“Edhe nëse nuk konfirmohet aktakuza kundër presidentit Thaçi, pas katër ose pesë muajsh ne do të duhet të fillojmë procesin e zgjedhjes së një presidenti”, tha Gjini të mërkurën.
Ai shtoi se AAK-ja do të donte të shmangte zgjedhjet e parakohshme që do të ndodhte automatikisht nëse të tri përpjekjet për të zgjedhur një president të ri dështojnë në parlament.
Sipas kushtetutës së Kosovës, çdo qytetar i republikës mund të kandidojë për president nëse ai ose ajo dorëzon firmat e të paktën 30 deputetëve në parlament.
Kandidati i suksesshëm duhet të marrë votat e dy të tretave të 120 deputetëve që të mund të fitojë. Nëse asnjë kandidat nuk merr të paktën dy të tretat e votave në dy raunde votimesh, një votim i tretë mbahet midis dy kandidatëve që fituan më shumë vota. Në këtë votim, një shumicë prej 61 votash është e mjaftueshme për të siguruar presidencën.
AAK-ja aktualisht është pjesë e një qeverie koalicioni në Kosovë së bashku me Lidhjen Demokratike të Kosovës, LDK, NISMA, Listën Serbe dhe parti të tjera që përfaqësojnë pakicat etnike.
Megjithatë, kanë lindur tensione përsa i takon mënyrës si po trajtohet dialogu i ndërmjetësuar nga BE-ja, të cilin Haradinaj dhe ministri i drejtësisë Selim Selimi e kanë kritikuar vazhdimisht.
Në deklaratën e saj të mërkurën, AAK-ja e përsëriti atë kritikë, duke deklaruar se do të preferonte të shihte SHBA-në të udhëhiqte dialogun, duke përfunduar “me njohje të ndërsjellë midis dy vendeve”.
Ajo shtoi se nuk e mbështet “dialogun teknik aktual me koordinatorë të nivelit të ulët”, duke iu referuar Koordinatorit të ri të emëruar të Kosovës për Dialogun, Skënder Hyseni të LDK-së.
Haradinaj ka thënë se dialogu teknik aktual “ka punuar për më shumë se një dekadë në favor të Serbisë, duke e lënë Kosovën të izoluar”.
Si për ironi, Haradinaj është përballur me të njëjtat akuza për krime lufte si Thaçi për shkak të rolit të tij në konflikt.
Në vitin 2019, ai dha dorëheqjen si kryeministër pasi Zyra e Prokurorit të Specializuar, e cila po heton krimet e kryera gjatë dhe pas luftës në Kosovë, e thirri atë për ta marrë në pyetje. Ai tha se nuk mund të ishte njëkohësisht kryeministër dhe një i dyshuar për krime lufte.
Një skenar i ngjashëm ndodhi në mars 2005, kur ai ishte kryeministër në një administratë të mëparshme, kur ai dha dorëheqjen pasi u akuzua nga Gjykata e atëhershme Penale Ndërkombëtare për ish-Jugosllavinë. Ai u lirua nga akuzat në vitin 2008 për shkak të mungesës së provave. Ai u lirua për herë të dytë nga akuzat nga e njëjta gjykatë në nëntor 2012.
