Gjykata Kushtetuese shfuqizoi ligjin special dhe vendimin të qeverisë, që i hapën rrugën shembjes së godinës së Teatrit Kombëtar, duke i cilësuar ato si antikushtetuese dhe në cenim të parimit të shtetit të së drejtës.
Gjykata Kushtetuese rrëzoi të premten si antikushtetuese një seri vendimesh të qeverisë shqiptare, të cilat i hapën rrugën prishjes së Teatrit Kombëtar në maj të vitit të shkuar.
Sipas njoftimit të publikuar në faqen zyrtare, Gjykata Kushtetuese pranoi pjesërisht kërkesën e Presidentit të Republikës, duke shfuqizuar si antikushtetues ligjin special nr. 37/2018 si dhe vendimin e 8 majit 2020 të qeverisë, që e kaloi Teatrin në pronësinë e Bashkisë së Tiranës.
Gjykata Kushtetuese nuk ka gjetur dakordësi dhe nuk ka arritur shumicën prej 5 votash ndaj kërkesës për shfuqizimin e vendimit të Këshillit Bashkiak të Tiranës për shembjen e godinës së teatrit sa i përket juridiksionit. Për pasojë, kërkesa për shfuqizimin e VKB është rrëzuar.
Në përfundim, Gjykata Kushtetuese ka vendosur edhe pezullimin e zbatimit të ligjit dhe vendimit të Këshillit të Ministrave deri në hyrjen në fuqi të vendimit përfundimtar –duke i dhënë një fitore morale protestuesve për çështjen e teatrit.
Gjykata Kushtetuese vlerëson se Ligji nr.37/2018, i cili përcaktonte një procedurë të veçantë negocimi për lidhjen e kontratës për projektin urban dhe godinën e re të teatrit, cënon lirinë e veprimtarisë ekonomike, parimin e shtetit të së drejtës dhe atë të decentralizimit dhe të autonomisë vendore. Gjykata Kushtetuese shton gjithashtu se edhe vendimi i qeverisë cenon parimin e shtetit të së drejtës.
Tetatri Kombëtar u shëmb në orët e para të mëngjesit të 17 maj 2020, duke shënuar fundin e një beteje që vijoi prej dy vjetësh e gjysmë mes qeverisë dhe Bashkisë së Tiranës nga njëra anë dhe aktivistëve nga ana tjetër, të cilët e denoncuan atë njëkohësisht si një shembull tipik i klientelizmit politik dhe si një sulm ndaj trashëgimisë kulturore dhe memories historike të vendit.
Kundër shembjes së Teatrit Kombëtar reagoi edhe Bashkimi Europian, përmes Komisioneres Mariya Gabriel, e cila mbulon mes të tjerash çështjet e kulturës.
Kryeministri Edi Rama mori vetë përgjegjësinë për shembjen duke deklaruar atëherë se shembja u krye për t’i hapur rrugë ndërtimit të një teatri të ri, ndërsa shau mbrojtësit e trashëgimisë kulturore si njerëz që nuk e duan zhvillimin.
Në maj të vitit 2020, Prokuroria e Posaçme Kundër Korrupsionit dhe Krimit të Organizuar, SPAK njoftoi se kishte nisur hetimin lidhur me kallëzimin e kryer nga Aleanca për Mbrojtjen e Teatrit, AMT ndaj kryetarit të bashkisë së Tiranës, Erion Veliaj dhe nënkryetarit Arbjan Mazniku, por sipas SPAK, nuk kishte person nën hetim dhe ende nuk është njoftuar ndonjë konkluzion lidhur me këtë padi.
