Përpara votimit të mosbesimit që do të mbahet të enjten ndaj qeverisë, kryeministri Zoran Zaev e shtyu dorëheqjen e tij të paralajmëruar, duke thënë se do të qëndrojë për të mbajtur në këmbë qeverinë e udhëhequr nga socialdemokratët.
Kryeministri socialdemokrat i Maqedonisë së Veriut, Zoran Zaev, të martën vonë lajmëroi se do ta shtyjë dorëheqjen e tij të shpallur për një kohë të pacaktuar, në përpjekje për të mbështetur shumicën aktuale të brishtë në parlament dhe për ta nxjerrë vendin nga kriza e tij politike.
“Është e rëndësishme të mos lejohet që vendi të kthehet në një të kaluar të njollosur me grindje brenda dhe jashtë vendit, të mos rrezikohet procesi euroatlantik dhe sepse ne po përballemi ende me pandeminë dhe krizën energjetike”, tha Zaev në një mbledhje të komitetit qendror të partisë së tij.
Kjo do të nënkuptonte “një shtyrje të përkohshme të dorëheqjes së tij në përpjekje për të mbajtur shumicën parlamentare në anën e socialdemokratëve. Unë, sinqerisht, pres që shumica demokratike të stabilizohet”, shtoi ai.
Komiteti qendror socialdemokrat ka shtyrë edhe dorëheqjet e paralajmëruara të kryesisë së partisë. “Vendimi i sotëm do të thotë që të gjithë duhet të jemi në lartësinë e detyrës”, tha për mediat një anëtar i komitetit qendror, Pero Kostadinov.
Lëvizjet vijnë një ditë përpara votimit të mosbesimit të së enjtes kundër qeverisë së Zaevit, të cilën partia kryesore e opozitës së krahut të djathtë VMRO DPMNE e paraqiti në parlament të hënën.
Votimi do të tregojë se cila palë aktualisht mban shumicën në parlamentin prej 120 vendesh, ose nëse do të mbahen zgjedhje të parakohshme.
Opozita pohon se tani ka të paktën 61 deputetë në anën e saj, ndërsa socialdemokratët në pushtet këmbëngulin se do të përpiqen të mbajnë mbështetjen e të paktën 62 deputetëve. Të dyja palët gjatë tri ditëve të fundit kanë lënë të kuptohet se më shumë deputetë mund t’u bashkohen së shpejti.
Kriza politike shpërtheu pas rezultateve të dobëta të papritura të qeverisë në zgjedhjet lokale. Zaev më pas më 30 tetor njoftoi dorëheqjen e tij edhe si kryeministër edhe si kryetar i partisë së tij.
Megjithatë, ai këmbënguli që shumica në parlament duhet të vazhdojë pa të deri në zgjedhjet e ardhshme të rregullta të planifikuara për vitin 2024.
Ky zhvillim e futi qeverinë në një situatë të panjohur dhe VMRO DPMNE javën e kaluar pretendoi se kishte krijuar një shumicë të re në parlament.
