Deputetet demokrate paralajmëruan dërgimin e kryeministrit Edi Rama në komisionin e etikës për gjuhën e përdorur dhe kërkuan reagim nga koleget socialiste. Debati nuk arriti të prodhojë një qëndrim të përbashkët ndaj gjuhës diskriminuese.
Gjatë një debati të gjatë të hënën në Kuvend, kryeministri Edi Rama përdori shprehjen “balonë tabake” për të ironizuar deputeten e Partisë Demokratike, Jorida Tabaku. Fjalori i Ramës u denoncua si ‘gjuhë misogjene’ nga Tabaku, ndërsa debati për përdorimin e gjuhës diskriminuese me bazë gjinore në Parlament vijoi edhe në seancën e së martës.
Protagoniste të debatit u bënë gratë deputete nga të dyja krahët e politikës, të cilat ndonëse i kërkuan njëra-tjetrës dënimin e gjuhës seksiste në politikë, nuk arritën një qëndrim të përbashkët për autorët e këtyre sulmeve.
Jorida Tabaku u kërkoi deputeteve socialiste që të mbanin qëndrim ndaj ‘sulmeve në vazhdimësi të kryeministrit ndaj zonjave të PD-së, ndërsa deputetja Flutura Açka lajmëroi se do t’a referonte në Komisionin e Etikës në Kuvend gjuhën e përdorur nga kryeministri për të kërkuar masë displinore ndaj tij.
“Sjelljen e kryeministrit do e depozitoj në sekretariat dhe shpresoj të merrni masa. Ju keni të drejtën tuaj të silleni e përunjur përpara kryeministrit tuaj, por ne nuk e kemi detyrim këtë gjë. Nëse ju ndiheni të zgërlaqur para tij e nuk flisni, ne nuk e kemi këtë sjellje, jo vetëm para kryetarit tuaj, por edhe para kryetarit tonë,” tha Açka.
Për ministren Belinda Balluku, fjalori fyes është një çështje që u përket të dyja gjinive dhe debati për diskriminim gjinor nuk vlen.
“Nuk ia vlen të bëjmë bisedë që u goditën gratë apo burrat. Jemi të gjithë njësoj. Askush nuk duhet të ofendohet,” tha ajo.
Balluku u kujtoi gjithashtu kolegeve demokrate se asnjëra prej tyre nuk doli në mbrojtje të grave ministre, kur kolegu i tyre, Agron Gjekmarkaj i quajti “haremi i kryeministrit” apo “kukullat e krimit”.
“Duhet të biem të gjithë bashkë dakord, që komisioni i etikës duhet të flasë edhe për gratë e majta edhe për të djathta,”tha ajo.
Në përgjigje ndaj Ballukut, deputetja Grida Duma u kujtoi deputeteve socialiste se nuk reaguan kur kryeministri përdori një foto të saj në fushatë në mënyrë seksiste.
“Në të njëjtin duel që na ftove, do çohesh e do thuash ndjesë që kryeministri ju përdori foton për fushatë,” tha Duma, duke i kërkuar kolegut Gjekmarkaj që të kërkojë ndjesë për fjalën “harem” nëse e ka përdorur në kontekstin e gabuar.
Edhe pse deputetet iu referuan Kodit të Sjelljes, debati nuk arriti dot të prodhojë një qëndrim të përbashkët ndaj gjuhës diskriminuese dhe fyese në Kuvend, por tentoi të relativizonte përdorimin e saj nga pikëpamja politike.
Kthimi i sallës së Kuvendit në një medium të gjuhës misogjene përbën shqetësim për organizatat e shoqërisë civile.
Sipas Ines Leskajt, drejtuese e Rrjetit të Fuqizimit të Gruas Shqiptare, përdorimi i gjuhës seksiste në politikë ndikon në përkeqësimin e dhunës me bazë gjinore dhe përmasat e saj në shoqëri.
“Nuk mund të flasim për dhunë me bazë gjinore nëse nuk prekim realitetin emergjent lidhur me gjuhën seksiste, diskriminuese dhe fyese ndaj grave,” tha Leskaj për BIRN, duke komentuar debatin në Kuvend.
Në këtë kontekst, Leskaj tha se edhe arritja pozitive “me një qeveri me 12 ministre” bie menjëherë poshtë dhe qëndron si promocion apo strategji politike në këmbë.
Leskaj sugjeron që gratë deputete në Kuvend të përdorin “Aleancën e Grave Deputete”, një organizëm që u mundëson bashkëpunimin dhe solidaritetin, pavarësisht forcës politike së cilës i përkasin.
