NATO nuk ka plane të ndryshojë angazhimin e saj paqeruajtës në Kosovë, mësoi BIRN të martën, gjashtë ditë pasi Rusia nisi një pushtim të Ukrainës.
“Angazhimi i NATO-s në Kosovë nuk ka ndryshuar”, tha një zyrtar i NATO-s për BIRN përmes postës elektronike.
“Ne mbetemi të përkushtuar përmes KFOR-it, i cili kontribuon për një mjedis të sigurt dhe për një stabilitet më të gjerë në Ballkanin Perëndimor”, shtoi ai.
Përveç KFOR-it, NATO tha se vazhdon të kryejë aktivitete për ndërtimin e kapaciteteve në mbështetje të organizatave të sigurisë së Kosovës brenda mandatit të tyre fillestar.
Ministri i Mbrojtjes së Kosovës, Armend Mehaj të dielën i kërkoi NATO-s që t’i ofrojë Kosovës “anëtarësim të përshpejtuar”, duke përsëritur thirrjen e tij që SHBA-ja të krijojë një bazë të përhershme ushtarake në territorin e saj, tre ditë pasi ushtria ruse pushtoi Ukrainën.
“Anëtarësimi i përshpejtuar i Kosovës në NATO është një nevojë imediate për të garantuar sigurinë dhe stabilitetin në rajon dhe më gjerë, pasi Evropa dhe bota po përballen me një sfidë serioze të sigurisë pas agresionit të ashpër të Rusisë ndaj Ukrainës”, shkroi Mehaj në Twitter pas refuzimit të presidentit serb Aleksandër Vuçiç për t’iu bashkuar sanksioneve kundër Rusisë.
Pas publikimit të lajmit në mediat ndërkombëtare, hashtag-u #KosovanëNATO, duke i kërkuar Aleancës që të sigurojë një rrugë të shkurtër për anëtarësimin e Kosovës në të, filloi të jetë në trend.
Të martën, Lidhja Demokratike e Kosovës në opozitë, LDK, i bëri thirrje Parlamentit që të miratojë një projekt-rezolutë që i bën thirrje qeverisë të ndërmarrë “të gjitha hapat e nevojshëm për të paraqitur kërkesën për anëtarësim të Kosovës në NATO dhe BE”.
Të tjerë kanë përdorur rrjetet sociale për t’i bërë jehonë thirrjes.
“NATO-ja është në Kosovë, por ka ardhur koha që edhe Kosova të jetë në NATO”, tha Memli Krasniqi, kreu i Partisë Demokratike të Kosovës në opozitë, PDK.
“Duke qenë se NATO-ja është një forcë e rëndësishme ushtarake, ajo do ta transformonte në mënyrë drastike situatën e sigurisë në Ballkanin Perëndimor nëse anëtarët e saj mundësojnë që Kosova të bëhet anëtarja e saj e 31-të e Aleancës”, theksoi ish-ministrja e jashtme e Kosovës, Meliza Haradinaj.
Aktualisht, rreth 3,800 ushtarë nga vendet anëtare të NATO-s dhe vendet aleate të saj janë duke shërbyer si paqeruajtës në Kosovë si pjesë e misionit të KFOR-it, i cili filloi në qershor 1999, pas të cilës një fushatë sulmi ajror 78-ditore solli tërheqjen e forcave serbe nga Kosova.
Megjithatë, NATO-ja nuk e komentoi kërkesën e Kosovës.
Siç parashikohet në Nenin 10 të Traktatit të Atlantikut të Veriut, “Palët, me marrëveshje unanime, mund të ftojnë çdo shtet tjetër evropian që është në gjendje të çojë përpara parimet e këtij Traktati dhe të kontribuojë në sigurinë e zonës së Atlantikut të Veriut për të aderuar në këtë Traktat”.
“Çdo shtet i ftuar në këtë mënyrë mund të bëhet Palë në Traktat duke depozituar instrumentin e tij të aderimit në Qeverinë e Shteteve të Bashkuara të Amerikës. Qeveria e Shteteve të Bashkuara të Amerikës do të informojë secilën nga Palët për depozitimin e çdo instrumenti të tillë aderimi”, thuhet në Traktat.
Katër shtete anëtare të NATO-s (Spanja, Greqia, Sllovakia dhe Rumania) nuk e njohin Kosovën, duke e bërë më të vështirë çdo plan për anëtarësimin e ardhshëm të vendit në të.
