Kreu i Prokurorisë së Posaçme kundër Korrupsionit dhe Krimit të Organizuar, Arben Kraja, raportoi për vështirësitë në dy vitet e para të punës së SPAK gjatë një seance në komisionin parlamentar të Ligjeve të premten në Kuvend, ndërsa u përball me pyetje për presionin politik dhe publik.
Kraja shpjegoi vonesat për gjetjen e zyrave dhe krijimin e Byrosë Kombëtare të Hetimit si dhe i paraqiti komisionit një raport statistikor për çështjet e hetuara. Megjithatë, diskutimi u fokusua kryesisht tek deklaratat publike të kryeministrit Edi Rama për punën e SPAK si dhe te çështjet me ngarkesë politike.
Kreu i grupit parlamentar të Partisë Demokratike, Enkelejd Alibeajt e pyeti Krajën lidhur me deklaratat e Ramës, të cilat i konsideroi ndërhyrje në punët e drejtësisë.
“Ju e konsideroni ndërhyrje në punët tuaja dhe a rrënon kjo besimin e publikut tek ju?” pyeti Alibeaj, duke shtuar nëse Kraja e shihte të nevojshme që Kuvendi të miratojë një dispozitë penale të posaçme që të ndalojë të gjitha ndërhyrjet në drejtësi.
Kraja ripërsëriti qëndrimin e tij se nuk ia lejonte ligji të komentonte deklarata publike, por shtoi se nuk e shihte aq shqetësuese këtë gjë sa të kthehej në ligj.
“Kemi një parim, të mos ndikohemi nga deklarimet publike. Nuk i ndalojmë dot, por ne duhet të vijojmë të shohim letrat që kemi të jemi korrekt me ligjin,” tha ai.
Edhe deputeti socialist, Fatmir Xhafaj konstatoi tentativat për ndërhyrje, por shtoi se prokurorët e SPAK mbrohen nga ligji dhe se është në dorën e tyre që të vendosin të mos tundohen nga këto intimidime.
“A ka përpjekje për ndikim dhe për ta deformuar dhe delegjitimuar, për të kontrolluar dhe për të interferuar? Padiskutim që ka. Por ju jeni maksimalisht të mbrojtur,”i tha Xhafaj Krajës.
“Puna juaj do ta dëshmojë nëse prokurorët i kanë shpëtuar tundimit për të ndarë me të tretët,” shtoi ai.
Ndërsa deputeti Pandeli Majko i tha Krajës se SPAK ka vetëm një kundërshtar dhe ajo nuk është politika, por është pritshmëria e publikut për punën e këtij institucioni.
Kraja u përgjigj se prokurorët ishin të pavarur në punën e tyre, edhe nga drejtuesi i SPAK. Ndërsa shqetësimeve të deputetëve socialistë pse nuk merr në shqyrtim dosjen e 21 janarit, ai iu përgjigj se është çështje ligjore kompetencash, jo zgjedhje dhe se bëhej fjalë për një dosje që e kishte prokuroria e Tiranës.
Shqetësimi kryesor i shprehur nga të dyja palët në komision ishte pritshmëria që ka publiku tek SPAK në luftën antikorrupsion, që ajo të ishte prioritet dhe jo sporadike me disa raste arrestimesh.
Deputeti i PD-së Oerd Bylykbashi kërkoi po ashtu që prioritet të ishin krimet zgjedhore, ose korrupsioni zgjedhor, siç e quajti ai. “Krimi zgjedhor është pika ku martohet krimi i organizuar me politikën,” tha Bylykbashi dhe shtoi “ka ende shumë për të bërë nga SPAK që ky fenomen të rrudhet me shpejtësi”.
Raporti i dorëzuar nga SPAK ishte i ndërtuar në formë statistikore për punën e kësaj strukture gjatë vitit 2021, ndërsa deputetët i kërkuan Krajës që raportimi të kishte dhe një analizë gjetjesh dhe rekomandimesh.
