Indeksi i Çmimeve të Konsumit ofroi një lajm të keq dhe një lajm të mirë, ku lajmi i keq është që në terma vjetorë vendi po përjeton inflacionin më të lartë që nga viti 1998 ndërsa lajmi i mirë është që ndryshimi mujor i çmimeve ishte negativ, gjë që do të thotë se mallrat dhe shërbimet kushtuan lehtësisht më pak në qershor nga sa patën kushtuar në maj. Dallimi është i madh për shkak se ngadalësimi i çmimeve në terma mujorë mund të sugjerojë mbarimin e kësaj faze inflacioniste dhe rikthimin në një situatë pak më normale në muajt në vijim. Gjithsesi, pavarësisht se inflacioni mujor nuk është më aq i lartë nga sa ishte në tremujorin e parë të këtij viti, vlerësimi i Bankës së Shqipërisë është që inflacioni vjetor do të vijojë të rritet deri në vjeshtë. Ù
Inflacion me dy shpejtësi
Indeksi i Çmimeve të Konsumit u rrit me 7.4% në qershor në krahasim me qershorin e vitit të kaluar. Rritja kryesore e çmimeve është shkaktuar nga ushqimet dhe nga nafta ndërsa pjesa tjetër e mallrave të konsumit, të tilla si veshjet, mobiljet apo kujdesi shëndetësor, kanë mbetur të pandryshuara. Shqiptarët u detyruan të shpenzojnë 13% në shumë në ushqime dhe 27% më shumë në transport në krahasim me një vit më parë, ku kostot më të mëdha u shkaktuan nga drithërat, vaji vegjetal dhe nafta. Vajrat dhe yndyrat janë shtrenjtuar me 30% sipas INSTAT ndërsa buka dhe drithrat me 20%. Bulmeti është shtrenjtuar me 19%, sheqeri me 14% dhe mishi me 9%.
Përkundër rritjes dramatike të çmimeve të ushqimeve, siç ndodh zakonisht në situata stagflacioniste, qytetarët janë detyruar të kursejnë në mallra jo të nevojës së përditshme për të mbuluar kostot shtesë të ushqimeve dhe të naftës dhe kjo ka bërë që kërkesa për mallrat e tjera dhe çmimet të jenë të dobëta. Grupi i veshjeve dhe këpucëve pati një inflacion në masën 1.6%, kujdesi shëndetësor u rrit me vetëm 0.3% ndërsa mobiljet dhe mirëmbajtja e shtëpisë u shtrenjtua me 3.6%. Çmimi i librave mbeti praktikisht njësoj si një vit më parë.
Situata është veçanërisht shqetësuese për ekonomistët për shkak se rënia e konsumit të mallrave të tjera mund të sjellë rënie të punësimit dhe të investimeve, gjë që do të pasohet në një fazë të dytë me ngadalësim të përgjithshëm të ekonomisë, ndërkohë që çmimet do të vijojnë të jenë të larta.
Inflacioni gjithsesi pritet të jetë vetëm një nga problemet ekonomike të vendit. Ndërsa bankat qendrore rrisin interesat, interesat e borxhit publik shqiptar pritet të rriten gjithashtu, duke shkaktuar rritje të kostos së borxhit për taksapaguesit dhe pamundësi të mëtejshme të qeverisë për të ndërhyrë në mbështetje të ekonomisë.
