Indeksi i Çmimeve të Konsumit u rrit me 7.4% në dhjetor në krahasim me një vit më parë, duke shënuar një rritje më të vogël se sa në muajt e shkuar, bëri të ditur Instituti i Statistikave të hënën. Pasi shënoi kulmi në tetor me 8.3%, ritmi i rritjes u ngadalësua në nëntor me 7.9% dhe në dhjetor me 7.4, duke sinjalizuar në këtë mënyrë se kulmi i krizës së çmimeve që nisi nga nëntori i vitit 2021 ka kaluar tashmë dhe se çmimet janë rrugës drejt ftohjes.
Objektivi i Bankës së Shqipërisë është që inflacioni të luhatet në një bandë nga 2 në 4% me objektiv mesataren prej 3%. Inflacioni në Shqipëri ka qenë poshtë objektivit të Bankës së Shqipërisë që nga viti 2012 ndërsa reformat ekonomike kanë dështuar ndezin rritjen ekonomike ndërsa taksat shtesë të qeverisë socialiste pas vitit 2013 kanë rritur buxhetin e shtetit duke pakësuar buxhetin e familjeve.
Kriza aktuale e çmimeve u shkaktua nga rritja ndërkombëtare e çmimeve të naftës dhe të ushqimeve që erdhi në përfundim të pandemisë së COVID-19. Ftohja e çmimeve në nëntor dhe dhjetor duket se ka ardhur gjithashtu si pasojë e uljes së çmimeve të karburanteve dhe të ushqimeve të importuara. Kështu, rritja e çmimeve në grupin Transport në dhjetor ishte vetëm 6%. Çmimi i naftës bruto në tregun ndërkombëtar ka rënë në nivelin që kishte para luftës në Ukrainë ndërsa çmimi i diezelit në bursë është aktualisht rreth 900 USD për tonë, nga 800 që ishte në janar të vitit 2022.
Ushqimet janë grupi me inflacionin më të lartë. Në dhjetor, çmimet e ushqimeve ishin 14.2% më të larta se sa në dhjetor 2021. Çmimet e ushqimeve patën shënuar kulmin në nëntor me rritje 14.7%.
Gjasat janë që çmimet të vijojnë të ftohen përgjatë vitit 2023 ndërsa Banka e Shqipërisë parashikon “kthim në objektiv” pra inflacion në masën 3% rreth gjysmës së parë të vitit 2024. Konsumi në Shqipëri pritet të goditet nga rritja e kostos së kredive ekzistuese të dhëna me kontrata me interes të luhatshëm si dhe nga reduktimi i kredisë së re për shkak të rritjes së shpejtë të interesave. Por edhe inflacioni i importuar bashkë me mallrat e importit pritet të ftohet për shkak të situatës globale, ku shumica e ekonomive të zhvilluara do të njohin ngadalësim.
