Qeveria shqiptare dërgoi për miratim parlamentar me procedurë të përshpejtuar ndryshime në kontratën koncesionare me kompaninë SICPA për prodhimin e pullave fiskale, një kontratë e nëshkruar në vitin 2010 dhe që u ka kushtuar shqiptarëve deri më sot afro 9 miliardë lekë (75 milionë euro).
Relacioni shoqërues thotë se palët kanë shqyrtuar faktin që kontrata e vitit 2021 është zbatuar në mënyrë të pjesshme nga qeveria shqiptare, e cila nuk përdori pullat e prodhuara nga kjo kompani për produktet farmaceutike, por vetëm për produktet e alkoolit. Relacioni thotë gjithashtu se SICPA ka hequr dorë nga pretendime të mundshme ndaj qeverisë shqiptare me kushtin që kontrata të zgjatet deri më dhjetor 2024, periudhë gjatë së cilës ajo pritet të arkëtojë rreth 9 milionë euro të tjera në vit.
Kompania SICPA pati një kapital themeltar prej 6.8 milionë lekësh (më pak se 60 mijë euro) kur ajo u themelua në vitin 2010. Kontrata me afat dhjetëvjeçar normalisht ka skaduar. Kompania pati një bilanc me humbje deri në vitin 2015 dhe me fitime pas këtij viti.
Në vitin 2021, kompania pati të ardhura në nivelin 8.2 milionë euro dhe fitime në masën 1.5 milionë euro. Fitimet neto vjetore ishin 25 herë më të larta se sa kapitali themeltar.
Shqiptarët i paguajnë pullat fiskale të SICPA-s kur blejnë produkte akcize, të tilla si cigare, birrë apo verë. Kostoja e këtyre pullave është dhjetëfish më e lartë se sa ka qenë para hyrjes në fuqi të këtij koncesioni. Qeveria e atëhershme pretendoi se investimi do të sillte rritje të të ardhurave buxhetore përmes lehtësimit të luftës kundër kontrabandës me mallrat e akcizës. Në fakt, importi i taksueshëm i cigareve ishte mbi 4 mijë tonë në vit para kësaj kontrate dhe ka rënë në 2500-3000 tonë në vit gjatë dekadës së fundit.
