Tre zyrtarë dhe një ish- zyrtare të Bashkisë Dimal, janë arrestuar nga policia pasditen e së martës, pas caktimit të masave të sigurimit nga Prokuroria e Posaçme kundër Korrupsionit dhe Krimit të Organizuar, SPAK. Së bashku me zyrtarët mësohet se janë arrestuar edhe 2 punonjës të një kompanie private.
Në një njoftim për shtyp Prokuroria e Posaçme kundër Korrupsionit dhe Krimit të Organizuar bëri me dije se në bashkëpunim me Byronë Kombëtare të Hetimit dhe Policinë e Shtetit, kishte arrestuar zyrtarët e urbanistikës dhe transportit me akuzat e “Korrupsionit pasiv”, “Ushtrimi i ndikimit të paligjshëm ndaj personave që ushtrojnë funksione publike” dhe “Shpërdorimit të detyrës”.
SPAK njoftoi se gjykata kishte pranuar kërkesën e prokurorit dhe vendosi caktimin e masës së sigurimit “Arrest në burg”, për zyrtarët lokalë Agim Çuni, shef i emergjencave, Altin Pali, drejtor i Zyrës së Urbanistikës dhe Agim Guraj, me detyrë shef i IKMT.
Ndërkohë Valentina Jançe, me detyrë në kohën e kryerjes së veprës penale shefe urbanistike pranë Bashkisë Dimal, e dyshuar për veprat penale të “Shpërdorim detyre”, u caktua masa e sigurimit arrest në shtëpi.
Së bashku me katër zyrtarët e bashkisë është caktuar masa e “Arrest në burg” për Arjan Demiraj, inxhinier në një shoqërie tregtare, i akuzuar për “Ushtrimit të Ndikimit të Paligjshëm ndaj personave që ushtrojnë funksione publike”. Masë sigurimi me burg u dha edhe për Vait Koshi, ekonomist, menaxher i një shoqërie tregtare, i dyshuar për “Korrupsioni aktiv”.
Burime nga Drejtoria Vendore e Policisë Berat bëjnë me dije se masat e ekzekutimit ndaj Palit dhe Çunit u ekzekutuan në ambientet e bashkisë së Dimalit.
Hetimet për çështjen nisën më 25 nëntor të vitit 2020 pas denoncimit të bërë në SPAK, nga Petrit Baho, banor i Njësisë Administrative Poshnje.
Më 25 Nëntor 2020 Baho denoncoi shkatërrimin e pronës e tij i nga ana e Bashkisë Dimal për ndërtimin e një lulishte në Poshnje, por më pas rezultoi se bashkia i kishte dhënë leje një tjetër qytetari për të ndërtuar në pronë. Shkatërrimi i pronës së Brahos rezultoi nga hetimet e SPAK thjeshtë si favorizim dhe jo me qëllim zgjerimin e hapësirave publike, siç kishte pretenduar bashkia. Zyrtarët dyshohet se jepnin leje ndërtimi kundrejt ryshfeteve me vlera nga 2500 euro deri në 3000 euro.
