Në vitin 2007, Lefter Maliqi, një ish-oficer policie, fitoi komunën e Otllakut në qarkun Berat me 47% të votave, duke garuar me partinë Lëvizja Socialiste për Integrim dhe duke mposhtur dy partitë tradicionale PD dhe PS. Në vitin 2009, Maliqi u bë deputet për Partinë Demokratike, duke sfiduar socialistët në një nga bastionet e vet më besnike. Maliqi braktisi PD-në më 2017, kur partia i dha një pozicion humbës në listën e deputetëve dhe për një periudhë të shkurtër, u bë drejtor te qeveria e kryeministrit Edi Rama. Në vitin 2019, ai pranoi mandatin si deputet i Beratit pasi deputetët e Partisë Demokratike braktisën parlamentin dhe dorëzuan mandatet. Ai u bë pjesë e të ashtuquajturës Opozitë e Re, e cila ndihmoi qeverinë “Rama” të miratojë disa nga ndryshimet më kontroverse në legjislacion, përfshirë ndryshime në kodin zgjedhor, të cilat penalizuan opozitën në vitin 2021 dhe ndihmuan Ramën të fitojë një mandat të tretë.
Sot, Maliqi, 51 vjeç, duket se kërkon të bëjë historinë duke garuar për koalicionin Bashkë Fitojmë për postin e kryetarit të Bashkisë Kuçovë. Maliqi thotë se ka origjinë nga Kuçova, ndërsa ka lindur në fshatin Lapardha, i cili gjendet në ish-komunën Otllak. Vetë komuna Otllak është pjesë e bashkisë Berat.
Rezultatet zgjedhore të së shkuarës sugjerojnë se Maliqi është në fakt duke tentuar thuajse të pamundurën. Kuçova, një ish-qytezë industriale dhe ushtarake e kohës së komunizmit, si dhe komunat përbërëse të saj, ka votuar socialistët vazhdimisht dhe vazhdimisht. Në vitin 2007 socialistët fituan 51% të votave, më 2011, 52%, më 2021, 53%. Partia Demokratike dhe LSI, në zgjedhjet parlamentare të vitit të kaluar, morën vetëm 39% të votave. Me pak fjalë, duket sikur asgjë nuk mund ta ndryshojë rezultatin, me përjashtim të faktit që Maliqi ka demonstruar në të shkuarën kapërcime të mëdha.
Maliqi përballet me kryebashkiakun aktual, Kreshnik Hajdari, një ish-drejtor i OSHEE-së gjatë qeverisjes socialiste 2013-2019. Hajdari e mori postin e kryetarit të bashkisë në zgjedhjet pa garë të vitit 2019. Partia Demokratike ka vendosur të garojë në këtë bashki me Ilirjan Koxhajn, një ekonomist që ka punuar në fushën e mikrokreditit.
Kuçova përbëhet nga qyteti i Kuçovës dhe ish-komunat Kozarë, Perondi dhe Lumas. Kjo bashki ka 45 mijë qytetarë të regjistruar me të drejtë vote ndërsa në vitin 2021, pjesëmarrja në votime ishte vetëm 40%. Qyteti i Kuçovës ka 54% të votuesve të regjistruar të bashkisë por në zgjedhjet e vitit 2021, në këtë njësi administrative, pjesëmarrja ishte vetëm 35%, gjë që reflekton largimet në masë nga kjo qytezë ish-industriale.
Bashkia Kuçovë shtrihet në një fushë pjellore në pjesën më të madhe si dhe në një zonë kodrash të buta në ish-komunën Lumas.
Qyteza e Kuçovës u ndërtua si qytezë industriale që në vitet 1930 kur aty pranë u zbulua naftë. Në kohën e komunizmit, qyteza u zhvillua me impjante të ndryshme industriale, një termocentral dhe industri kimike, si dhe u bë baza e ndërmarrjes që ofronte shërbimet e shpimit dhe mirëmbajtjes së puseve dhe infrastrukturës ndihmëse për nxjerrjen e naftës. Qyteti u bë gjithashtu shtëpi për ushtarakët që shërbenin në bazën ajrore të Kuçovës.
Vendburimi i Kuçovës vijon të ketë një prodhim nafte në nivele shumë të ulëta. Mbyllja e industrisë solli rënie të shpejtë të popullsisë në këtë qytet, gjë që vërehet në pjesëmarrjen shumë të ulët në zgjedhje.