Votimi u bë pa debat dhe në mënyrë të nëanshme pasi opozita vijoi protestën për rrëzimin e dy kërkesave të saj për ngritjen e komisioneve hetimore gjatë sesionit të vjeshtës.
Kërkesat për hetimin e konçensioneve në shëndetësi dhe ajo për përdorimin e të dhenave personale për qëllime politike, e njohur si “databasa e patronazhistëve”, u rrëzuan nga PS-ja me justifikimin e nevojës për një ligj të ri.
Më herët PS ka refuzuar dhe hetimin për zbatimin e ligjit për investimet strategjike, çështjen e humbjes së qeverisë në një gjyq arbitrazhi me biznesmenin italian Francisko Beçhetti dhe hetimin e përdorimit të fondeve publike për udhëtimet charter të kryeministrit Edi Rama.
Një komision hetimor për problematikat në zgjedhjet e vitit 2021 u ngrit por u pezullua pa asnjë rezultat konkret.
Ndryshimet e inicuara nga deputetja Ermonela Felaj kufizojnë të drejtën e opozitës për ngritjen e tyre dhe vendosin rregulla që i japin mundësi mazhorancës të kontrollojë vendimmarrjen për mbedhjen e provave dhe thirrjen e dëshmitarëve.
Sipas PS-së ndryshimi i ligjit erdhi si nevojë për implementimin e interpretimeve të bëra nga Gjykata Kushtetuese për këtë çështje dhe për të “disiplinuar” punën e këtyre komisioneve në të ardhmen.
Po ashtu ndryshimet i japin mundësi shumicës të vendosë për mbledhje me dyer të mbyllura gjatë dëshmive në komision, me arsyetimin se publiciteti mund të dëmtojë dëshmitarët ose të dhënat që paraqiten në komision.
Që pas komisionit të bujshëm për aferën e inceneratorëve që përfundoi punimet në mars 2022 mazhoranca ka refuzuar çdo kërkesë tjetër të opozitës, duke mohuar një të drejtë kushtetuese të saj për të kontrolluar qeverisjen.
Në traditën e Kuvendit të drejtën për hetime parlamentare nuk e ka përdorur vetëm opozita, por edhe mazhoranca në një rast në vitin 2021, kur ngriti komision për të shkarkuar Presidentin e atëhershëm Ilir Meta, vendim që u hodh poshtë nga Gjykata Kushtetuese.
Në seancën e së enjtës deputetët socialistë miratuan me 75 vota pro dhe ndryshimet në ligjin “Për tatimin mbi vlerën e shtuar”, “Për aderimin e Republikës së Shqipërisë në Unionin për Konservimin e Natyrës (IUCN)”. Si dhe ratifikuan dy marrëveshje, një me Bashkimin Europian “për hartat treguese të rrjetit transevropian të transportit në Shqipëri” dhe me qeverinë gjermane për projektin e investimeve në sektorin e ujërave.