Fotoja e publikuar nga deputeti i Partisë Demokratike Flamur Noka, tregonte Sadushin me një shall të kuq rreth qafës, një simbol i lidhur me komunizmin, në krah të tre zyrtarëve socialistë, deputeti Vullnet Sinaj, kryebashkiaku socialist i Vlorës, Ermal Dredha dhe prefekti i këtij qarku, Flamur Mamaj.
“Me shallin e pionierit të Enverit”- tha Noka të mërkurën duke u treguar foton mediave, dhe akuzoi kryetarin e gjykatës së lartë për thyerje të kodit të etikës.
“Gjyqtari duhet të shmangë sjelljeve që krijojnë përshtypje se është i angazhuar politikisht”- tha Noka duke iu referuar këtij kodi të miratuar nga Këshilli i Lartë Gjyqësor.
Por, në një deklaratë për mediat të enjten Sadushi tha se pjesëmarrja në 80 vjetorin e krijimit të Brigadës së Pestë antifashiste nacional-çlirimtare nuk binte në kundërshtim me funksionin e tij, si gjyqtar.
Ai po ashtu e arsyeton pjesëmarrjen një detyrim familjar, pasi një prej themeluesve të kësaj brigade ka qenë babai i tij, Maliq Sadushi.
“Një akt historik nuk gjykohet, duke e njësuar atë me regjimin komunist që u instalua pas çlirimit të vendit dhe për këtë nuk mund të akuzohen edhe çlirimtarët antifashistë, që si qëllim patën veçse çlirimin e vendit të tyre”- arsyeton Sadushi.
Në këto rrethana sipas tij, pjesëmarrja në këtë lloj aktiviteti “nuk cilësohet si angazhim në një aktivitet politik, e aq më pak të identifikueshëm me një parti të caktuar politike në Shqipëri”.
Kreu i GjL-së nuk e përmënd mbajtjen e shallit të kuq, një simbol i kudogjendur në vendet ish-komuniste, që njihet ndryshe dhe si “shalli i pionerit”.
Në Shqipëri dhe vendet e tjera ish-komuniste fëmijët e shkollave duhet të tregonin devotshmërinë ndaj partisë-shtet për të fituar të drejtën që të mbanin këtë shall në qafë. Këtë të drejtë nuk e kishin fëmijët e familjeve disidente të regjimit, të cilët etiketoheshin si “Armiq të Popullit”.
Shalli është përdorur nga forcat partizane kryesisht ato ruse, por dhe nga ato shqiptare, gjatë Luftës së Dytë Botërore dhe simbolizonte revolucionin komunist, i nisur në Rusi në fillim të shekullit 20.
