Kompania multinacionale e qendrave të kontaktit Teleperfomance, ka ndërmarrë një projekt të ri të quajtur WAHA (Work At Home Agent), duke i imponuar punonjësve që punojnë nga shtëpia të instalojnë kamera në ambientet private.
Sipas Sindikatës Kombëtare së Qendrave të Kontaktit, pasi zhvendosi pjesën më të madhe të punonjësve për të punuar nga shtëpia, kompania Teleperformance u ka kërkuar atyre të vendosin kamera në ambiente private dhe të përbashkëta të shtëpisë, ku shpeshherë mund të jetojnë apo punojnë dhe pjesëtare të tjerë të familjes, duke cënuar kështu të drejtën e privatësisë së qytetarëve.
“Monitorimi i punës së agjentëve të telemarketingut deri tani është kryer nëpërmjet dy sistemeve të brendshme – TIMS dhe Blackboard – sisteme të cilat arrijnë të kontrollojnë çdo veprimtari të punonjësit pa qenë nevoja për instalimin e kamerave,” i tha BIRN kryetari i Sindikatës Kombëtare së Qëndrave të Kontaktit – Solidariteti, Tonin Preçi.
“Kjo kërkesë e re nga ana e kompanisë dhe CEO-së Diego Pisa nuk është justifikuar me asnjë referencë ligjore,” shtoi ai.
Në kushtet e pandemisë, shumë kompani kanë zhvendosur punonjësit e tyre për të punuar nga shtëpia, por sipas sindikatës vendosja e kamerave në ambiente private si dhoma e gjumit apo ambiente të tjera të shtëpisë është cënim i të drejtës së privatësisë, e drejtë që rrjedh nga Konventa Ndërkombëtare për Mbrojtjen e të Drejtave dhe Lirive Themelore të Njeriut.
Kjo kërkesë ka krijuar shqetësime të shumta mes punëtorëve, të cilët kanë nisur një peticion për parandalimin e detyrimit në fjalë për pajisje me kamera.
Sipas Preçit aktualisht një pjesë e punonjësve janë duke punuar me praninë e kamerave në shtëpi, por ai theksoi se nga ana e supervizorëve të tyre ka pasur një lloj paqartësie.
“Disa prej supervizorëve i kanë drejtuar për t’i mbajtur kamerat hapur gjatë gjithë 8-orëshit të punës, ndërsa një pjesë u kanë thënë se duhet t’i hapin vetëm kur të marrin urdhër prej tyre për t’u monitoruar,” shpjegoi ai.
Sindikata Solidariteti është angazhuar në rrugë institucionale dhe organizative për të parandaluar këtë veprim që e cilëson të “paligjshëm dhe të padrejtë”.
Drejtuesi i sindikatës i tha BIRN se ata tashmë kanë kontaktuar me Inspektoriatin e Punës si edhe me kompaninë Teleperformance për një takim nga afër, derisa të gjejnë një zgjidhje për këtë çështje që sipas tyre shkel të drejtën e privatësisë.
“Nëse nuk do marrim zgjidhje apo përgjigje të arsyeshme të bazuara në ligj qoftë nga kompania apo nga Inspektoriati i Punës, ne do vijojmë me çështjen deri në gjykatë, si edhe do ndërmarrim masa të tjera si protesta apo bojkote të punës,” përfundoi Preçi.