Teksa partitë politike po përgatitin mitingjet e tyre përmbyllëse për zgjedhjet parlamentare të 23 qershorit, një temë që nuk është prekur në fushatat e tyre zgjedhore është ajo e sundimit të ligjit.
Edhe pse politikanët dhe deputetët duhet të shfaqin sjellje të mira që të merren si shembull nga qytetarët, të dhënat e marra nga Policia e Shtetit tregojnë se ata janë disa nga shkelësit më të shpeshtë të rregullave të qarkullimit rrugor.
Ata jo vetëm kanë marrë me dhjetëra gjoba në këto raste, por gjithashtu shpesh refuzojnë t’i paguajnë ato.
Shqiptarët e kishin të ndaluar të zotëronin makina private nën regjimin stalinist të Enver Hoxhës, kur i vetmi mjet transporti i lejuar ishin biçikletat e thjeshta.
Tani, dy dekada pas rënies së komunizmit, rrugët janë bllokuar nga makinat.
Me të drejtë banorët e kryeqytetit shqiptar, Tiranë, thonë se ata kanë më shumë Mercedes për frymë se shumica e qyteteve të tjera të Europës.
Por ndërsa numri i automjeteve në rrugë është rritur në mënyrë të vazhdueshme, standardet e ngarjes së tyre nuk janë përmirësuar.
Rreth 400 aksidente fatale automobilistike regjistrohen çdo vit, të cilat rezultojnë në 13.9 vdekje për 100,000 banorë, pak më shumë se mesatarja e BE-së, siç tregon dhe një studim i Bankës Botërore.
Një prej shoferëve më të këqinj është dhe ministri i brendshëm, Flamur Noka, i cili para se të bëhej pjesë e kabinetit, ndërsa qe ende një deputet, ka marrë 17 gjoba me vlerë 15,700 lekë (€ 110).
Nëse do të përllogarisnim këtu edhe kamatë-vonesat, ministri duhet të shlyejë një total prej 22.000 lekësh (€ 155).
Gjobat e Nokës janë regjistruar për mungesë të rripit të sigurisë, kalim të parregullt, mosrespektim të sinjalistikës rrugore, parkim të parregullt dhe të dyfishtë, dhe të tjera.
I kontaktuar nga BIRN, një zëdhënës i ministrit, Leonard Olli, fillimisht e mohoi se Noka i ka marrë gjobat.
Pasi u është dhënë targa e makinës dhe të dhëna të tjera nga baza e të dhënave të policisë së shtetit, Olli fajësoi për shkeljet një nga të afërmit e ministrit.
“Ai ia ka dhënë makinën në fjalë një të afërmi të tij vite më parë, por ky i fundit nuk ka regjistruar transferimin e automjetit,” pohoi Olli.
I venë nën presion për të zbuluar se si një i afërm i ministrit mund të qarkullojë me një makinë që nuk ishte në pronësi të tij dhe të mbledhë kaq shumë gjoba pa u ndalur nga policia, Olli argumentoi se dënimet kanë ndodhur para se ministri t’i bashkohej kabinetit.
“Baza e të dhënave tregon qartë kohën kur janë lëshuar gjobat, dhe ato janë vënë përpara se [Noka] të merrte postin e tij [si ministër],” tha Olli.
Sipas një urdhri të lëshuar nga paraardhësi i Nokës, çdo automjeti që ka më shumë se tre gjoba të papaguara, i hiqet automatikisht leja e qarkullimit dhe nuk u lejohet qarkullimi në rrugë deri sa gjoba të jenë paguar.
Noka nuk është i vetmi politikan shqiptar që ka marrë një numër të madh gjobash dhe nuk i ka paguar ato.
Të dhënat e policisë tregojnë se të paktën tetë politikanë të tjerë nga koalicioni në pushtet dhe nga opozita kanë mbledhur një numër të madh të gjobave të trafikut që mbeten të papaguara.
Rekordi mbahet nga deputeti dhe ish-kryeministrit socialist, Bashkim Fino, i cili ka 18 gjoba të papaguara në emër të tij.
Shkeljet e trafikut të Finos përfshijnë parkim të dyfishtë dhe mosrespektim të sinjalistikës rrugore.
Një tjetër ministër i cili nuk ka paguar për shkeljet e tij të trafikut është Sokol Olldashi, Ministri i Transportit dhe Punëve Publike.
Ai ka shtatë gjoba të papaguara të regjistruara për automjetin e tij privat, me një kosto të përgjithshme, duke përfshirë edhe kamatë-vonesat, prej 10000 lekë (€ 70).
Olldashi ishte gjithashtu në mesin e listës së politikanëve dhe deputetëve të listuar në janar, si debitorë për mospagimin e taksave të regjistrimit të automjeteve të tyre në kohë.
Të dhënat e siguruara nga BIRN në atë kohë treguan se lista e debitorëve përfshinte mes të tjerëve dhe Presidentin, Kryetarin e Parlamentit dhe gati një të tretën e deputetëve.
Pasi ai u listua ndër mospaguesit e taksave, ministri kërkoi falje publike për neglizhencën e tij dhe premtoi se “nuk do të ndodhte kurrë më.”
Një tjetër politikan i njohur me një numër të madh të gjobave të papaguara është dhe Kastriot Islami, i cili ka shërbyer në periudha të ndryshme si kryetar i parlamentit, zëvendëskryeministër, ministër i financave, ministër i jashtëm dhe ministër i arsimit.
Islami, i cili për më shumë se dy dekada ka qenë një deputet për socialistët e opozitës para se të kalonte kohët e fundit me demokratët në pushtet, ka dhjetë gjoba të papaguara trafiku të regjistruara në bazën e të dhënave.
Lista e politikanëve mes shkelësve të trafikut që nuk kanë paguar gjobat e tyre përfshin dhe tre deputetë socialistë, Arben Isaraj, Ben Blushi dhe Damian Gjiknuri, të cilët kanë akumuluar deri në nëntë, katër dhe shtatë gjoba të papaguara respektivisht.
Fatbardh Kadilli, një deputet nga Partia Demokratike në pushtet, ka pesë gjoba të papaguara në emër të tij, ndërsa Shpëtim Idrizi, kreu i Partisë për Drejtësi, Unitet dhe Integrim, ka tetë.
