Një gazsjellës i ri që lidh Rumaninë me Moldavinë fqinje që u përurua sot (të mërkurën) do të reduktojë varësinë energjetike të Moldavisë nga Rusia.
Gazsjellësi i ri që lidh qytetin e Jasit në Rumaninë lindore me qytetin Ungheni në Moldavi do të ndihmojë ish republikën Sovjetike të reduktojë varësinë e saj nga importet e gazit nga Rusia.
Kryeministri Victor Ponta i Rumanisë dhe ai i Moldavisë Iurie Leanca morën pjesë në ceremoninë e inaugurimit të gazsjellësit 45 kilometra të gjatë.
“Ky gazsjellës do t’i lejojë Moldavisë të hapë një rrugë alternative furnizimi dhe rrjedhimisht të shmangë ndonjë krizë të re si ajo e vitit 2009, kur [gjiganti shtetëror rus i energjisë] Gazprom ndërpreu furnizimin e gazit natyror në shumë vende Europiane si pasojë e mosmarrëveshjeve që kishte me Ukrainën,” tha eksperti moldav Victoria Bucatru.
Faza e parë e gazsjellësit do të dërgojë gaz natyror vetëm te një zonë pranë kufirit. Rreth 100 kilometra gazsjellës mbeten për t’u ndërtuar për ta zgjatur atë deri në Kishinjev, kryeqyteti i Moldavissë, duke shmangur rrjetin aktual të gazsjellësve që është nën pronësinë e Gazprom.
Gazsjellësi Jani-Ungheni ka kushtuar rreth 30 milionë euro dhe ndërtimi zgjati më pak se një vit. Bashkimi Europian mbuloi një të tretën e kostove ndërsa pjesa tjetër u mbulua nga Rumania.
Rumania prodhon rreth 11 miliardë metra kub gaz në vit, duke mbuluar rreth 75 për qind të nevojave të veta vjetore. Pjesa tretër furnizohet ekskluzivisht nga Rusia.
Vendi ballkanik po përpoqet të reduktojë varësinë nga energjia ruse, kryesisht duke diversifikuar rrugët e furnizimit me gaz.
Moldavia qe pjesë e Rumanisë nga viti 1918 deri më 1940, kur Bashkimi Sovjetik e aneksoi atë. Para vitit 1918 qe pjesë e Perandorisë së Rusisë.
Moldavia u bë vend i pavarur më 1991 dhe të dy vendet kanë të njëjtën etni dhe gjuhë. Rreth 80 për qind e popullisë prej 4.1 milionë banorësh të Moldavisë janë rumunë dhe flasin rumanisht si dhe rusisht.
