Pavarësisht ngrirjes së shpallur të procesit të zgjerimit të BE-së në pesë vitet e ardhshme, ekspertët thonë se riangazhimi i Gjermanisë në Ballkanin Perëndimor është një lëvizje pozitive për rajonin.
Udhëheqësit e Ballkanit u mblodhën javën e kaluar në Berlin për një konferencë mbi perspektivën ekonomike dhe Europiane të Ballkanit Perëndimor nën patronazhin e kancelares së Gjermanisë Angela Merkel.
Samiti uli në të njëjtën tryezë politikanët më të lartë nga Gjermania, BE-ja dhe Ballkani. Konferenca e Ballkanit Perëndimor pritet të bëhet takim i rregullit i përvitshëm, ku takimi i rradhës do të mbahet në Austri më 2015.
Pas samitit Merkel tha se të gjitha vendet e rajonit kanë një të ardhme në BE dhe janë duke ecur drejt anëtarësimit në BE.
“Fakti që të tetë kryeministrat, ministrat e jashtëm dhe ministrat e ekonomisë u ulën sëbashku është provë e progresit të madh që rajoni ka bërë gjatë viteve të fundit dhe Komisioni Europian e vendet anëtare të BE-së dëshirojnë të vijojnë ndihmën e tyre,” deklaroi ajo.
Ekspertët vendës në rajon e shohin samitin si një shenjë e riangazhimit të Gjermanisë në Ballkan pasi BE-ja shpalli një ngrirje të zgjerimit të Bashkimit për pesë vitet e ardhshme.
Duke marrë parasysh rolin udhëheqës politik të Gjermanisë dhe ndikimin ekonomik brenda BE-së, vërejnë ata, samiti që tashmë do të zhvillohet çdo vit mund të japë nxitjen e nevojshme për reformat kyçe në rajon përgjatë pesë viteve të ardhshme ndërkohë që vendet anëtare rimarrin veten nga lodhja që kanë pësuar me zgjerimet e shkuara.
“Angazhimi i Gjermanisë është i rëndësishëm për shkak të pozicionit që mban ky vend brenda Bashkimit, ku shumë vendime të rëndësishme vështirë se mund të merren pa miratimin e tij,” thotë Gjergj Vurmo, një ekspert mbi integrimin evropian në Institutin për Demokraci dhe Ndërmjetësim në Tiranë.
“BE-ja duhet ta mbajë frymën e zgjerimit të lartë në Ballkan në një kohë kur ka thashetheme që thonë se komisionari i zgjerimit të BE-së do të shkurtohet si pozicion,” shtoi ai.
Gledis Gjipali, kreu i Lëvizjes Europiane në Shqipëri, një institucion kërkimor me bazë në Tiranë, është dakord, duke argumentuar se fokusimi i rigjalllëruar mbi Ballkanin është lajm i mirë për shkak se qe vetë Merkel që vendosi frena në zgjerimin e mëtejshëm të BE-së vitin e kaluar.
“Gjermania është lokomotiva e Europës, e cila e tërheq atë përpara jo vetëm ekonomikisht por edhe politikisht në procese të ndryshme,” tha ai. “Në këtë aspekt është shumë e rëndësishme që të shohim që Ballkani po vendoset nën fokusin e Gjermanisë,” shtoi ai.
Sipas Vurmos, samiti do të bëhet edhe më i rëndësishëm nëse prodhon detyra konkrete për t’u zbatuar nga rajoni në disa fusha kyçe të reformave, si lufta kundër korrupsionit dhe pavarësia e sistemit të drejtësisë; gjithsesi, kjo duhet të ndodhë pa dublifikuar punën e Komisionit Europian.
“Shumica e vendeve në rajon kanë probleme me pavarësinë e drejtësisë dhe korrupsionin e gjithëpërhapur,” tha ai.
“Përveç të qenit të monitoruar ata kanë nevojë për shtytje më të fortë për reformë, gjë që Gjermania mund ta japë,” shtoi ai.
Gjipali është dakord duke vërejtur se lufta kundër korrupsionit dhe krimit të organizuar ka qenë prioritet kyç për Gjermaninë kundrejt vendeve të Ballkanit dhe që është artikuluar në mënyrë të përsëritur.
“Pakti i arritur në Berlin qe që shtetet e Ballkanit do të lëvizin përpara vemën në rast se në luftën kundër korrupsionit dhe krimit të organizuar do të kemi rezultate konkrete, në këmbim të aleancës dhe mbështetjes gjermane për rajonin,” tha ai.
