FMN largohet pa marrëveshje, bisedimet vijojnë në distancë

Fondi Monetar Ndërkombëtar njoftoi se e përfundoi vizitën në Tiranë për rishikimin e dytë të marrëveshjes, por duket se nuk ra dakord me qeverinë për reformat.

Misioni i Fondit Monetar Ndërkombëtar që vizitoi Tiranën gjatë dy javëve të fundit duket se nuk arriti mirëkuptim dhe as deklaratë të përbashkët me qeverinë shqiptare por premtoi se bisedimet do të vijojnë në distancë ndërsa për momentin nuk është e qartë nëse qeveria shqiptare do të marrë këstin e rradhës të kredisë së FMN-së.

“Diskutimet mbi plotësimin e rishikimit do të vijojnë nga Uashingtoni dhe misioni do të kthehet për të plotësuar punën e vet në një datë të pacaktuar”, thuhet në një deklaratë të FMN për median.

FMN duket se u largua këtë herë edhe pa deklaratën e përbashkët për shtyp me Ministrinë e Financave dhe Guvernatorin e Bankës së Shqipërisë, gjë që ndodh në fund të çdo misioni.

Për momentin nuk dihen arsyet e largimit të FMN pa marrëveshje.

Shqipëria hyri në marrëdhënie ndihme me Fondin Monetar Ndërkombëtar vitin e kaluar kur premtoi se do të reformojë financat e vendit dhe do të reduktojë borxhin publik në këmbim të 330 milionë eurove kredi të buta nga FMN për mbështetje buxhetore si dhe disa qindramilionë dollarëve kredi nga Banka Botërore për projekte të ndryshme.

Marrëveshja e firmosur vitin e kaluar e detyron qeverinë shqiptare të reduktojë borxhin publik me 3 për qind të Prodhimit të Brendshëm Bruto për çdo vit duke filluar nga viti 2016. Është një detyrim që kërkon domosdoshmërisht rritje taksash ose ulje shpenzimesh dhe pikërisht këto aspekte të marrëveshjes kanë qenë pikat e nxehta të mosmarrëveshjeve me misionin e FMN.

Drejtuesi i misionit të FMN Nadeem Ilahi deklaroi në qershor pas rishikimit të parë se ndonëse kriteret e performancës qenë realizuar për tremujorin e parë, marrëveshja kërkon impenjime të tjera për vitet në vazhdim.