Presidenti Kroat në kohë lufte, Franjo Tuxhman, dhe jo politikanët serbë, e propozoi shkëmbimin e një pjese të popullatës mes dy republikave, tha lideri i nacionalistëve Vojislav Sheshel në Gjykatën e Hagës.
Sheshel (Seselj), kreu i Partisë Radikale Serbe, tha ne gjyqin e liderit serb të Kroacisë, Goran Hadzic në Gjykatën e Hagës të mërkurën se presidenti i kohës së luftës së Zagrebit, Tuxhman (Tudjman) ishte burri që fshihej pas idesë së “zhvendosjes njerëzore”- një shkëmbim i popullatës mes Serbisë dhe Kroacisë.
“Tuxhman e përkrahu idenë fillimisht, më pas u pranua nga Cosic. Gjatë gjithë kohës ishte një ide e civilizuar për të shkëmbyer popullsinë, por ky propozim vinte mbi të gjitha nga pala kroate,” tha Sheshel.
“Fillova ta mbroj idenë vetëm në vitin 1992, kur rreth 300 mijë refugjatë erdhën në Serbi. Kur Serbia u mbush me refugjatë, sugjerova një shkëmbim popullsie si një nga zgjidhjet,” shpjegoi ai.
Shefi i Parisë Serbe Radikale po dëshmonte në mbrojtje të Hadzic, por është edhe vetë në gjyq në Hagë në lidhje me akuzat për krime lufte në ish-Jugosllavi.
Sipas aktakuzës, Hadzic dhe Sheshel ishin pjesë e një sipërmarrje të përbashkët kriminale që po kërkonte largimin e përhershëm të kroatëve dhe jo-serbëve nga pjesë të Republikës së Kroacisë gjatë luftës. Si rezultat, mijëra kroatë u larguan nga zonat e kontrolluara prej serbëve.
Por gjatë gjyqit, Hadzic dhe shumë prej dëshmitarëve të mbrojtjes pretenduan se kroatët u larguan vetë. Disa thanë edhe se kjo ndodhi si rezultat i një marrëveshje me forcat kroate.
Gjatë seancës së të mërkurës, Sheshel konfirmoi se Presidenti Slobodan Milosheviç mbështeti idenë e vullnetarëve nga Partia Radikale Serbe në luftimet si pjesë e ushtrisë jugosllave.
“Ai na dha hapësirë për t’u stërvitur… Nëse do të ishte kundër kësaj, do të na kishte parandaluar,” tha Sheshel.
“Serbia e mbështeste dhe financonte të gjithë sistemin e ushtrisë dhe Milloseviç e përfaqësonte regjimin serb si president,” shtoi ai.
Aktakuza pretendon se Hadzic dhe Sheshel kanë punuar sëbashku me forca serbe, përfshirë edhe Ushtrinë Popullore Jugosllave për të arritur qëllimet e veta në Kroaci.
Duke folur për lidhjet midis Hadzic dhe liderit famëkeq të paraushtarakëve Zeljko Raznatovic, i ashtuquajtur Arkan, Sheshel tha se kontakti ishte nisur prej Arkan dhe jo nga Hadzic.
“E di që kishte shumë foto të tyret së bashku. Por Arkan bënte foto me këdo dhe askush nuk mund të bënte apo thoshte gjë kundër tij,” shpjegoi Sheshel.
“Ai vinte në seanca qeveritare, ulej atje dhe askush nuk bënte asgjë,” shtoi ai.
Sipas aktakuzës kundër Hadzic, Arkan ishte gjithashtu pjesë e sipërmarrjes kriminale të përbashkët dhe njësia e tij paraushtarake koordinonte veprimet me liderin serb të Kroacisë.
Hadzic megjithatë e ka mohuar të kishte fuqi mbi Arkan. Bosi i paraushtarakëve nuk arriti kurrë në gjyqin e Hagës për shkak se mbeti i vrarë në vitin 2000 në Beograd.
Seselj ka qenë në gjyq për krime lufte që prej vitit 2003, kur ai u dorëzua vullnetarisht në gjykatën e Hagës të mbështetur nga OKB. Vendimi për të ishte planifikuar për tetorin e vitit të shkuar, por u shty pasi një prej gjykatësve në gjyq u largua prej paragjykimeve. Nuk është ende e qartë se kur do të jepet vendimi.
Gjyqi i Hadzic do të vazhdojë të enjten.
