Katër parti politike që aspirojnë të krijojnë një qeveri të re në Kosovë i kaluan menaxhimin e bisedimeve me Serbinë, të ndërmjetësuara nga Bashkimi Europian, Lëvizjes antiestabilishment Vetëvendosje.
Një marrëveshje për koalicion mes katër partive politike të Kosovës që synon ndërtimin e një qeverie i dha të mërkurën Lëvizjes Vetëvendosje menaxhimin e dialogut me Serbinë.
Marrëveshja u arrit mes Vetëvendosjes dhe tri partive të tjera në koalicionin e krijuar pas zgjedhjeve parlamentare të qershorit, Lidhjes Demokratike të Kosovës LDK, Aleancës për Ardhmërinë e Kosovës, AAK dhe Nisma për Kosovën.
Sipas marrëveshjes, “qeveria e Kosovës do të emërojë një anëtar të Lëvizjes Vetëvendosje për të drejtuar dialogun [me Serbinë]”.
Bisedimet mes tri partive të bllokut dhe Vetëvendosjes vijonin që prej tri muajsh. Gjithsesi kërkesa e Vetëvendosjes për të marrë përsipër dialogun me Serbinë i pati bllokuar për disa javë bisedimet për krijimin e koalicionit qeveritar.
Kushtet e marrëveshjes dukshëm acaruan aleatët e huaj të Kosovës. Përfaqësuesi Special i BE-së në Kosovë dhe krerët e misioneve të vendeve anëtare të BE-së lëshuan pak pas marrëveshjes një deklaratë të përbashkët ku theksohet rëndësia e dialogut.
“Ne ritheksojmë rëndësinë e madhe për vijimin e dialogut konstruktiv, të orientuar nga rezultatet dhe të lehtësuar nga BE në nivel politik dhe teknik për të sjellë normalizimin gjithëpërshirës të marrëdhënieve me Serbinë,” thanë ata në një deklaratë.
Lëvizja Vetëvendosje është e mirënjohur për organizimin e protestave të zhurmshme kundër dialogut me Serbinë, duke kritikuar marrëveshjet e arritura gjatë bisedimeve të ndërmjetësuara nga Bashkimi Europian si shitje të interesave të vendit.
Partia beson se Serbia fillimisht duhet të njohë pavarësinë e Kosovës, të shpallur në vitin 2008, para fillimit të bisedimeve për normalizimin e bisedimeve.
Marrëveshja për qeverinë erdhi vetëm dy ditë para se parlamenti i Kosovës të mblidhet për të zgjedhur një kryeparlamentar të ri. Gjykata Kushtetuese e Kosovës më herët anuloi zgjedhjen e një kandidati të bllokut me tri parti nën argumentin që partia që ka fituar më shumë vota ka të drejtë të propozojë kandidatin e parë.
Gjykata i dha shansin të propozojë një kandidat Partisë Demokratike të Kosovës, PDK, por nuk është e qartë nëse PDK mund të mbledhë 61 vota të nevojshme.
Koalicioni i opozitës ka bërë të qartë se nuk do të votojë për një kandidat të PDK-së dhe do të kandidojë sërish kandidatin e vet.
