Politikanët kroatë kanë shprehur pakënaqësinë mbi komentet e Vojisllav Sheshelit, që u tall me rënien e Vukovarit në 1991, duke kërkuar kthimin e tij të shpejtë në Hagë.
I liruar së fundmi dhe i akuzuar për krime lufte, Vojislav Shesheli i ka provokuar rëndë kroatët duke dërguar një deklaratë për shtyp në median kroate në ditën kur kroatët përkujtuan rënien e qytetit të Vukovarit ndaj forcave serbe më 1991.
Shesheli në mënyrë provokuese vlerësoi “ditën e çlirimit të Vukovarit”.
Politikanët kroatë dënuan komentin, duke kritikuar sërish lirimin e hershëm nga Haga për çështje shëndetësore.
Presidenti Ivo Josipovic postoi një koment në Twitter, ku tha “pas lajmërimit fyes në Ditën Përkujtimore për viktimat e Vukovarit, Shesheli duhet të kthehet në Hagë”.
Më herë këtë javë, Josipovic shprehu pakënaqësinë ndaj lirimit të hershëm të Sheshelit në një letër për presidentin e tribunalit të Hagës, Theodor Meron, ku e quajti mungesën e vendimit për gjyqin maratonë të Sheshelit, një dështim të drejtësisë penale ndërkombëtare.
Ish-kryeministrja Jadranka Kosor shkroi në Facebook se Shesheli duhet të rikthehet në Hagë, pasi komentet e tij fyen kujtimin e viktimave dhe vunë në lojë arsyen, institucionet ndërkombëtare, ligjin dhe drejtësinë”.
Deputeti kroat Dragutin Lesar shkoi në Twitter se nëse Shesheli nuk kthehen në Hagë, Kroacia duhet të bllokojë negociatat e mëtejshme të Serbisë për anëtarësimin në BE.
Anëtarë të një grupi të paqes serbe, Gra në të Zeza, ndërkohë u mblodhën në Beograd të martën duke përkujtuar viktimat e rrethimit të Vukovarit me një performancë të titulluar “Nuk do t’i harrojmë kurrë krimet e Vukovarit”.
Aktivistët qëndruan në heshtje, duke mbajtur tabela që kujtonin kalimtarët për rrethimin 87-ditor, kur 1000 civilë u vranë dhe 25.000 të tjerë u plagosën.
Stasa Zajovic, nga Gra në të Zeza, tha se “vrasja e një qyteti dhe e popullatës së tij nuk do të harrohet kurrë”.
Ushtria serbe duhet të hapë arkivat e saj të personave të zhdukur në Vukovar dhe tregojë të paktën respektin minimal për viktimat e krimeve të kryera nga Ushtria Popullore Jugosllave dhe njësitë paraushtarake, që vepruan me mbështetjen e madhe të regjimit serb,” tha Zajovic.
Anëarët e organizatës së krahut të djathtë, Zavetnici [Mbajtësit e Betimit], organizuan një anti-protestë ku mbanin pankarta ku lexohej “Vukovari nuk do të jetë kurrë Vukovar”.
Qendra e Ligjit Humanitar, me bazë në Beograd, gjithashtu i bëri thirrje autoriteteve serbe të hapin arkivat e Ushtrisë Popullore Jugosllave për të gjetur mbetjet e 48 viktimave të vrasjeve në Fermën Ovcara, që ende janë të humbur.
Qendra e Ligjit kujtoi se 265 civilë dhe të burgosur kroatë të luftës ishin ekzekutuar më 20 nëntor 1991 në fermën Ovacara, pranë Vukovarit, pas rënies së qytetit.
Ndërsa eshtrat e 193 viktimave u gjetën në një varr masiv në Grabovo dhe eshtrat e 17 të tjerëve u zhvarrosën nga zonat aty pranë, trupat e 48 personave nuk janë gjetur ende.
“Institucionet e Republikës së Serbisë, Ministria e Mbrojtjes dhe Agjencia e Inteligjencës Ushtarake kanë detyrimin të ndihmojë në zbulimin e të vërtetës rreth personave të zhdukur duke hapur arkivat dhe duke zbuluar informacione që do të ndihmonin në gjetjen e viktimave nga ferma Ovcara,” tha Qendra e Ligjit Humanitar të martën.
Tribunali i Hagës dënoi kolonelët e ushtrisë Jugosllave, Mile Mrksic dhe Veselin Sljivancanin me 20 dhe 10 vite burg respektivisht për vrasjet në Ovcara.
Prokuroria serbe e krimeve të luftës ka hapur gjithashtu disa çështje për krimet e luftës për vrasjet në Ovcara, ku rezultuan 16 të dënuar që u shpallën fajtor për krime lufte dhe që u burgosën me më shumë se 200 vite.
Megjithatë, Qendra Humanitare tha se shumë prej ish-oficerëve të Ushtrisë Popullore Jugosllave duhet të ndiqeshin penalisht për krimet e fermës Ovcara.
