|Foto: ICTY
Presidenti i Gjykatës së Hagës lajmëroi se vendimet e shumëpritura të gjyqeve të luftës për Ratko Mlladiç, Goran Hadzic dhe Vojisllav Sheshel po vonohen për shkak të shëndetit të tyre të dobët.
|Foto: ICTY
Theodor Meron, presidenti i Gjykatës Ndërkombëtare të Krimeve për ish-Jugosllavinë (ICTY), tha në raportin e tij të fundit vjetor në Këshillin e Sigurimit të Kombeve të Bashkuara ditën e mërkurë se gjykata po përballej me sfida të mëdha për shkak të problemeve shëndetësore të të pandehurve.
Meron tha se vendimi gjyqësor i komandantit ushtarak të Ushtrisë Serbe të Bosnjes Ratko Mlladiç, i cili më parë pritej të jepej në korrik të vitit 2016, tani mund të pritet “në mars të vitit 2017 ose edhe më vonë”.
Gjyqi i liderit serb të Kroacisë Goran Hadzic aktualisht po shtyhet për shkak të gjendjes së tij shëndetësore, ndërsa lideri i Partisë Radikale serb Vojisllav Sheshel është liruar përkohësisht për t’u kuruar nga kanceri, shtoi Meron.
“Problemet shëndetësore janë një shqetësim i pashmangshëm dhe ngrenë pyetje humanitare. Edhe pse gjykata përpiqet të sigurojë kujdesin e duhur mjekësor, zhvillimet në lidhje me shëndetin e të burgosurve ndonjëherë dalin jashtë kontrollit dhe, siç jam i sigurt që edhe Këshilli i Sigurimit e kupton, kjo mund të shkaktojë vonesa në punën e gjykatës,” shpjegoi ai.
Ndërkohë kryeprokurori i ICTY-së, Serge Brammertz, tha në Këshillin e Sigurimit të Kombeve të Bashkuara se Shesheli është tallur me Gjykatën e Hagës dhe ka ofenduar viktimat pas lirimit të tij për arsye shëndetësore muajin e kaluar dhe duhet rikthyer në paraburgim.
Brammertz tha se ai e kuptonte zemërimin e viktimave për mospasjen ende të një vendimi edhe pas 11 viteve gjyq për Sheshelin.
“Zyra e prokurorit kupton dhe ndan të njëjtin zhgënjim që vendimi i gjyqit nuk është marrë ende, kur dëshmitari i fundit dëshmoi në korrik të vitit 2010 dhe gjyqi u mbyllë në mars të vitit 2012,” tha Brammertz.
Ai i tha Këshillit të Sigurimit se prokuroria kërkoi që lideri nacionalist serb të kthehej në burg, pasi Shesheli tha se nuk do të pranonte të kthehej në gjykatë për të përfunduar gjyqin e tij.
Polemika e shkaktuar nga retorika e ashpër e Sheshelit pasi ai u kthye në Beograd “duhet të na inkurajojë të dyfishojmë përpjekjet tona për të siguruar dhënie llogarie për shkelje të rënda të të drejtës humanitare ndërkombëtare dhe të qëndrojmë të vendosur kundër të gjitha formave të revizionizmit,” shtoi Brammertz.
Vendimi i tij ishte planifikuar të jepej vitin e kaluar, por u shty pasi një nga gjykatësit në gjyqin e tij u hoq pas akuzave për njëanshmëri. Gjykatësi i ri pritet të vijojë punën së paku deri në fund të qershorit të vitit 2015 për të familjarizuar veten me detajet e çështjes, duke shkaktuar edhe një vonesë tjetër në këtë gjyq maratonë.
Duke folur për ndjekjet penale për krime lufte në gjykatat lokale në vendet e ish-Jugosllavisë, Brammertz tha se “është e nevojshme të bëhen përmirësime të mëtejshme”.
Por ai tha gjithashtu se arrestimi i fundit i 15 personave të dyshuar për rrëmbimin e 20 pasagjerëve nga një tren në qytetit boshnjak Strpci në vitin 1993 dhe më pas vrasja e tyre, ishte një operacion i përbashkëte nga autoritetet serbe dhe boshnjake dhe kjo kishte dhënë një shembull të mirë.
“Ky është një zhvillim shumë pozitiv që tregon se sa shumë mund të arrihet përmes bashkëpunimit efikas,” tha ai.
