Autoritetet e Sofjes kanë rënë dakord të marrin mbrapsht mbi 3000 azilkërkues që u shpërndanë në vende të tjera të Europës.
Në rritje të azilkërkuesve, shumica të ardhur nga luftërat në Lindjen e Mesme, Bullgaria ka rënë dakord të marrë mbrapsht më shumë se 3000 prej atyre që u përpoqën të rregullohen në vende të tjera të BE-së, thonë raportimet e medias.
Agjencia e lajmeve Novinite në Bullgari tha se Gjermania, Austria dhe Hungaria janë mes vendeve që duan të kthejnë në total rreth 7500 emigrantë në vendin më të varfër të BE-së, që tani ka rënë dakord të marrë të paktën 3163.
Sipas ligjeve të BE-së, vendi ku emigrantët mbërrijnë së pari duhet të përballet me kërkesat për azil. Si Bullgaria dhe Greqia fqinje thonë se rregulli është i padrejtë pasi barra i bie më së shumti vendeve në kufijtë e jashtëm të BE-së. Ata duan që barra e azilkërkuesve të ndahet në mënyrë të barabartë.
Qeveria ka vendosur gjithashtu të hënën që të shtojë ndërtesa të reja për të strehuar azilkërkuesit e rinj. Zëvendës kryeministrja Meglena Kuneva tha së fundmi që ajo priste rritje të emigrimit në mars, kur kushtet e motit të përmirësohen.
Kreu i Agjencisë Shtetërore të Bullgarisë për Refugjatët, që ka mbajtur postin për rreth një vit pasi u caktua në fund të 2013, kur u rrit ndjeshëm numri i refugjatëve në vend, është larguar së fundmi.
Numri i refugjatëve që kërkojnë azil u rrit ndjeshëm në Bullgari në 2013 teksa luftimet në Siri dhe Irak u përkeqësuan, ku shumë prej tyre hynë në vend përmes Turqisë gjatë rrugës për në Europën Perëndimore. Rreth 11,500 refugjatë mbërritën atë vit, shumë prej tyre kurdë të Irakut.
Në 2013 Bullgaria forcoi sigurinë në kufijtë e vendit me Turqinë, duke ndërtuar një kufi 32 km për të mbajtur larg emigrantët. Zyrtarët bullgarë po konsiderojnë shtimin e gardhit të kufirit.
