Protestuesit kërkuan të martën lirimin e reporterit Tomislav Kezarovski, dënimi me burg i të cilit u la në fuqi nga Gjykata e Apelit të Shkupit – megjithëse me një ulje të dënimit.
Më shumë se një mijë gazetarë dhe mbështetës që këmbëngulën që Tomislav Kezarovski është i pafajshëm – dhe se burgosja e tij është një goditje e lirisë së fjalës – protestuan të majtën përpara Gjykatës së Apelit përpara se të kalonin përpara ndërtesës së qeverisë maqedonase.
Ata vunë maska me fytyrën e Kezarovskit dhe slogane ku thuhej “Unë jam Kezarovski” dhe “së bashku jemi më të fortë”. Gazetarët fishkëllyen dhe bërtitën ‘liri për Kezon’ dhe ‘Pa drejtësi, s’ka paqe’ teksa lëvizën nëpër qendrën e qytetit.
Protesta u organizua nga ‘Bordi për mbështetjen e Kezarovskit’, që bashkon, mes të tjerave, Lidhjen e Gazetarëve të Maqedonisë, AJM dhe Sindikatën e Gazetarëve të Pavarur, SSNM.
Ata nxitën presidentin Gjorge Ivanov dhe ministrin e drejtësisë Adnan Jashari të lirojnë gazetarin.
“Jam krenar që qëndrojmë të bashkuar dhe shpallim lirinë tonë që është duke u sulmuar. Ata mund t’i burgosin gazetarët, por nuk mund të burgosin lirinë e fjalës që ne mbajmë brenda nesh. Kezarovski është burgosur për shkak se qeveria e tij nuk mund ta durojë kritikën. Ata duan një monopol mbi të vërtetën,” tha kreu i ZNM, Naser Selmani.
Kezarovski vetë u shfaq në protestë dhe u përshëndet nga turma.
Pasi kaloi gjashtë muaj në paraburgim, në tetor 2013 Kezarovski u burgos për katër vite e gjysëm për zbulim të identitetit të një dëshmitari të mbrojtur në një çështje vrasje në një artikull të botuar në revistën e lajmeve Reporter 92 në maj 2008.
Që atëherë, Kezarovski e ka kaluar kohën në arrest shtëpie, duke pritur apelin e tij.
Të premten, për të frikësuar gazetarët vendas dhe të huaj, si dhe lidhjet e mbrojtjes së të drejtave, Gjykata e Apelit në Shkup konfirmoi dënimin e tij ndonëse e uli atë nga katër vite e gjysmë në dy vite.
Policia ndaloi Kezarovskin dhe e futi në burg atë natë, por më vonë ai u lirua në arrest shtëpie ‘për çështje shëndetësore’ dhe u urdhërua të raportojë në burg muajin e ardhshëm për të vuajtur dënimin e mbetur.
Duke marrë parasysh kohën që ai ka kaluar në paraburgim dhe në arrest shtëpie, Kezarovski duhet të kryejë tani më shumë se tre muaj burg.
Gazetarët që dyshojnë se presion politik fshihet pas gjyqit të Kezarovskit thonë se ai u dënua përse bëri punën e tij dhe raportoi rreth një gënjeshtër të mundshme të policisë për dëshmitarët e mbrojtur.
Dëshmitari i mbrojtur që Kezarovski raportoi kishte akuzuar fillimisht dy njerëz për vrasje. Ata më vonë u liruan sepse gjykata zbuloi se dëshmitari nuk ishte i besueshëm.
Dëshmitari më vonë i tha gjykatës se ai kishte qenë në presion nga policia për të dhënë dëshminë.
Dështimi për të liruar Kezarovskin tërhoqi shumë kritika nga organizatat vendase dhe ndërkombëtare të gazetarëve si dhe nga Organizata për Siguri dhe Bashkëpunim në Europë, OSBE.
Duke e quajtur ‘një përgjigje shumë zhgënjyese dhe të pavend’ përfaqësuesja e lirisë së medias në OSBE, Dunja Mijatavic, tha se ishte koha për autoritetet maqedonase “të lehtësojnë presionin mbi median dhe të respektojnë zërat e lirë dhe kritikë. Kezarovski duhet të lirohet menjëherë”.
Qeveria e kryeministrit Nikola Gruevski nuk ka folur mbi këtë çështje që prej nxjerrjes së vendimit të ri. Më herë, kryeministri këmbënguli se ai nuk kishte të bënte me gjyqin.
