Azilkërkuesit kosovarë po kthehen mbrapsht teksa vendet e BE-së po shtrëngojnë masat e imigrimit të paligjshëm.
Rreth 70 imigrantë kosovar janë kthyer nga Budapesti në Prishtinë në një fluturim të organizuar nga ministria e brendshme e Kosovës.
Pasagjerët ishin një grup më i gjerë i emigrantëve kosovarë të drejtuar në vende si Austria, Suedia, Gjermania, Sllovakia, Finlanda dhe Hungaria të cilëve u kishte mbaruar statusi i azilkërkuesve në këto vende.
Ata u dërguan në Budapest dhe prej andej u kthyen në Prishtinë me avion. Shumica e tyre nuk do të jenë pjesë e programit të riintegrimit që qeveria e Kosovës po i ofron valës së emigrantëve për në BE, ku përfshihet ndihmë mjekësore dhe asistencë si dhe ndërmjetësim për gjetjen e vendeve të punës në Kosovë.
Betim Uka dhe gruaja e tij, Fexhirije, një çift i ri nga Besiana, që u mbajtën në një kamp në Hungari për 40 ditë, thanë se kushtet në kamp ishin të vështira, por se planifikonin gjithsesi të largoheshin përsëri nga Kosova sa më shpejt të ishte e mundur.
“Jam përpjekur të largohem nga Kosova tre herë. Nuk kam asgjë për të bërë këtu,” tha Uka. Ai tha se shumë të rinj ishin në kampe, si dhe shumë familje. “U trajtuam shumë ashpër nga autoritetet hungareze”, shtoi ai.
Babai i tij, Sahiti, po priste në aeroportin e Kosovës për të me të ëmën. “Nuk ka perspektivë nga Kosova për djalin tim. Jemi 10 vetë në familje dhe asnjëri nuk është i punësuar,” tha ai.
Sahit Uka tha se ndonëse familja zotëron pak tokë dhe e punon atë, ata nuk janë në gjendje të fitojnë jetesën nga bujqësia. Ai tha se nuk kishte të bënte me largimin e Betimit. “Nuk i dhamë djalit asnjë para për udhëtimin, ai kishte të tijat. Ne u përpoqëm ta ndalonim të largohej, por ai nuk e gjen veten këtu”.
Nikola Mihajlovic, një serb i Kosovës nga qyteti verior i përçarë i Mitrovicës, gjithashtu u kthye me avion së bashku me gruan dhe dy fëmijët. Ai kishte kaluar dy vite në Gjermani me bashkëshorten dhe kishin një apartament atje. Megjithatë, ai u njoftua se kërkesa e tij për azil ishte refuzuar dhe ai duhej të kthehej.
“Na kthyen sepse thanë se situata në Kosovë është e sigurt. Ata thanë se njerëzit në Kosovë nuk kanë shanse për të marrë dokumentet e azilit,” tha Mihajlovic. Njerëzit nga Kosova dhe Ballkani nuk kanë shanse për të marrë azil në BE-shtoi ai.
Ahmet Kurteshi, nga Kmetovaçi, një fshat pranë Gjilanit, po jetonte në një apartament në Suedi për 18 muaj derisa ai, gruaja dhe vajza e vogël u dërguan në një kamp në Suedi dhe më pas u çuan në Budapest nga ku u kthyen në Kosovë. Ai mezi mund ta përballonte udhëtimin e tij për në fshat, ndaj ministria e brendshme ia mundësoi.
Beqir Kajtazi dhe familja e tij u largua nga Kosova më 29 janar dhe mori një tren për në Budapest. Pak më vonë u vunë në një kamp. “Ne shpenzuam rreth 2000 euro për të gjithë udhëtimi. Fillimisht paguam 300 ose 200 euro për person te kontrabandistët për të na ndihmuar të kalojmë kufirin por më pas njerëz të tjerë na morën më shumë para në anën tjetër,” tha ai. “Disa njerëz u përballën me refugjatë sirianë që kalonin kufirin dhe iu vodhën sendet” shtoi Kajtazi. “Ne kaluam lumin në këmbë, në të ftohtë. Mbajta djalin tim Ardi në kurriz përgjatë lumit Tisa,” kujtoi ai.
Ai raportoi gjithashtu kushte të vështira në kampin hungarez. “Ne merrnim një ëmbëlsirë ose dy feta bukë për të gjithë ditën. Çarçafët nuk ishin të pastër, ishte ftohtë dhe kishte shumë pak higjienë,” tha Kajtazi.
Media ka raportuar vazhdimisht kushtet e rënda të kampeve të azilit në Hungari. Hungaria ka konfirmuar se një vajzë 2-vjeçare Arza Mustafa, familja e të cilës la Kosovën në shpresë të trajtimin për sindromën Down, vdiq në një kamp.
Pas një rritje të papritur në numrin e imigrantëve të paligjshëm nga Kosova që u përpoqën të hynin në BE përmes kufirit hungarez, disa shtete të BE ashpërsuan kushtet për azilkërkuesit.
Gjermania ka lajmëruar se e ka shkurtuar procedurën e azilkërkuesve nga disa muaj në vetëm dy ose tre javë. Ministri i brendshëm austriak tha se do t’i dërgonte kosovarët mbrapsht të paktën çdo dy javë.
