Raportohen shumë të plagosur. Analistët shqiptarë: Gruevski po bën luftë me shqiptarët për të shpëtuar qeverinë e vet kriminale. Reagojnë Shqipëria dhe Kosova. Lajme të pakonfirmuara flasin edhe për shumë të vdekur mes civilëve dhe policëve. Skena dramatike të evakuimit të popullsisë nga zona e luftimeve.
Policia maqedonase luftoi me një grup të armatosur të paidentifikuar në një lagje shqiptare të Kumanovës gjatë ditës së sotme ndërsa deri në orën 19.00 luftimet vijojnë. Gazetarët në vendngjarje raportuan për së paku një shtëpi në flakë ndërkohë që helikopterët maqedonas fluturojnë mbi zonë. Lajme të pakonfirmuara rreth orës 19.00 bënë të ditur se disa policë maqedonas janë vrarë.
Lumi Beqiri, një activist nga Kumanova tha se nga ballkoni i apartamentit të tij në katin e pestë sheh re të dendura tymi që po ngrihen nga ndërtesa ku gjenden dy shkolla fillore, njëra shqiptare dhe tjera maqedonase.
Beqiri i tha BIRN se njerëzit nga kjo lagje të zënë në mes të luftimeve, vrapuan në drejtim të qendrës së qytetit.
“Ka shumë të shtëna dhe shpërthime të zhurmshme herë pas here. Ka momente kur luftimet pushojnë dhe pastaj intensifikohen sërish,” tha ai.
Ministria e Brendshme e Maqedonisë deklaroi sot se një grup i madh njerëzish të armatosur është rrethuar nga forcat speciale të policisë maqedonase në një lagje të Kumanovës pas një shkëmbimi zjarri mëngjesin e të shtunës.
“Po merren masa për të thyer grupin e armatosur në atë pjesë të qytetit… Operacioni po vijon,” tha zëdhënësi i policisë Ivo Kotevski.
Të shtënat filluan rreth orës 4.30 të mëngjesit dhe vijuan deri në orën 9. Gjithsesi media raportoi se më shumë të shtëna u dëgjuan deri pas mesdite. Policia deklaroi se gjashtë oficerë të saj janë plagosur dhe dërguar në një spital në Shkup, një prej tyre në gjendje kritike. Ka shumë lajme të pakonfirmuara për shumë të plagosur dhe të vdekur.
Mjetet e blinduara të policisë maqedonase u vendosën në Kumanovë ndërsa media vendëse raportoi për shtëllunga tymi që dilnin nga së paku një shtëpi. Përgjatë autostradës Shkup-Kumanovë ka një prani të madhe të policisë.
Qyteti me përbërje etnike të përzjerë i Kumanovës gjendet rreth 25 kilometra në veri-lindje të Shkupit dhe qe pranë vijës së frontit gjatë konfliktit të vitit 2001 mes kryengritësve shqiptarë dhe forcave të sigurisë. Rreth 40 për qind e 100 mijë banorëve të Kumanovës janë shqiptarë.
Kryebashkiaku i Kumanovës Zoran Damjanovski, deklaroi në një konferencë për shtyp sot se dhuna është shkaktuar nga një “skenar i rrezikshëm që është dënuar nga të gjitha grupimet e qytetarëve në komunë.”
Ai këmbënguli se si shqiptarët ashtu edhe maqedonasit në qytet kërkojnë të jetojnë në paqe.
Konflikti i vitit 2001 përfundoi me një marrëveshje që i jep më shumë të drejta shqiptarëve të Maqedonisë dhe që solli edhe shpërndarjen e Ushtrisë Çlirimtare të Kosovës dhe krijimin e Partisë Bashkimi Demokratik për Integrim, parti që aktualisht është në koalicionin qeverisës me kryeministrin Nikola Gruevski.
Gruevski, kryeministër në mandatin e tij të tretë, është akuzuar se ka përgjuar mbi 20 mijë njerëz dhe se qeveria e tij është përgjegjëse për manipuminin e vazhdueshëm të zgjedhjeve si dhe për dhunë ndaj qytetarëve të vet, përfshirë dhunën që solli vdekjen e një të riu maqedonas në 2011 si dhe për fshehjen e fakteve rreth vdekjes së një gazetari në vitin 2013.
Opozita maqedonase po bën protesta të vazhdueshme në Shkup duke kërkuar dorëheqjen e Gruevskit dhe prej javësh analistët kanë shprehur frikën se Gruevski mund të shkaktojë përplasje të dhunshme me shqiptarët në përpjekje për të ruajtur pushtetin e vet.
Disa analistë shqiptarë i bënë thirrje sot qytetarëve shqiptarë dhe maqedonas të Maqedonisë të mos bien pre e këtyre tentativave të Gruevskit, i cili prej vitesh po konsiderohet si një diktator i vogël në Ballkan.
“Unë i kërkoj të gjithë qytetarëve, maqedonas, shqiptarë e të gjithë të tjerëve – të mos bien pre e provokimit të këtij konflikti të sajuar me pasojat e saj tragjike, synimi i të cilës është të shpëtojë këtë qeveri kriminale,” deklaroi Mersel Biljali në Facebook, analist dhe ish deputet.
“Ne nuk duhet të lejojmë kriminelët të na mashtrojnë. Ne duhet të përballemi me ta sëbashku. Ne kërkojmë që BDI të largohetr nga qeveria menjëherë,” tha ai.
Duke reaguar ndaj publikimit të lajmeve të pakonfirmuara për viktima, analisti Ramadan Ramadani tha: “Përcjellja e informacionit të paverifikuar për ndonjë vdekje është vdekje për mediumin”.
Ministria e Jashtme e Shqipërisë dhe ajo e Kosovës shprehën shqetësim për situatën dhe bënë thirrje për të gjitha palët për vetëpërmbajtje.
