Kryeministri i Kosovës, Isa Mustafa, do të diskutojë për marrëdhëniet Kosovë-Serbi me kancelaren gjermane Angela Merkel përpara se ajo të vizitojë Beogradin në korrik.
Mustafa do të takojë Merkelin në Berlin në fund të këtij muaji – i pari takim zyrtar i këtij niveli mes tyre.
Burimet brenda qeverisë së Kosovës kanë konfirmuar për Balkan Insight se Mustafa do të udhëtojë në Berlin dhe se ata do të bisedojnë për dialogun që vazhdon mes Kosovës dhe Serbisë në Bruksel, si dhe për marrëdhëniet bilaterale Kosovë-Gjermani, pak përpara se Merkel të vizitojë në Beograd në fillim të korrikut.
Lidhja Demokratike e Kosovës, një parti e të djathtës qendrore, ka një marrëdhënie të ngushtë me Bashkimin Demokratik Kristian të Merkelit. Të dyja janë pjesë e Partisë Popullore Europiane.
Analisti politik Fisnik Korenica thotë se roli i Gjermanisë në Ballkan, veçanërisht në lidhje me Kosovën, po zgjerohet.
“Synimi i këtij takimi është t’i jepet një drejtim më dinamik marrëdhënies mes Kosovës dhe Serbisë, diçka që Merkel do ta bëjë vetë në vend që të angazhojë Përfaqësuesen e lartë të BE, Frederica Mogherinin”.
Merkel aktualisht drejton Procesin e Berlinit, një iniciativë që filloi me Konferencën e Shteteve të Ballkanit Perëndimor në Berlin në 2014, që synon të rrisë bashkëpunimin mes shteteve në rajon.
“Procesi i Berlinit është një iniciativë e Merkelit, përmes të cilit ajo do të nxjerrë rajonin nga tensioni etnik duke i dhënë bashkëpunimit një aspekt ekonomik për të krijuar një ‘bashkëpunim të butë’ nën patronazhin e Berlinit,” vazhdoi Korenica.
“Përmes këtij procesi, Merkel po bëhet politikania drejtuese e BE në Ballkanin Perëndimor”.
Prishtina mirëpriti një nga konferencat në Mars, mbi investimet në infrastrukturën e Ballkanit, ku mori pjesë ministri i jashtëm serb, Ivica Daçiç – e para vizitë e një ministri serb që nga konflikti i 1999.
Merkel pritet të diskutojë zbatimin e Marrëveshjes së Brukselit me kryeministrin serb Aleksandër Vuçiç kur të vizitojë vendin në fillim të korrikut.
Qeveria e Kosovës ka një qasje të fortë pro-BE, duke përsëritur shpesh zotimin ndaj integrimit në BE. Aktualisht Kosova është në rrugën e nënshkrimit të një Marrëveshje Stabilizimi-Asociimi, një pararendëse e procesit të pranimit për shtetet e Ballkanit Perëndimor.
Kosova ka deklaruar pavarësinë nga Serbia – të cilën Beogradi nuk e njeh – në 2008 dhe deri më tani është njohur nga 23 prej 28 shteteve anëtare të BE.
