Prokuroria i kërkon KQZ-së të heqë nga listat e zgjedhësve 2800 votues fiktivë në Durrës, ndërsa vazhdon hetimet për të njëjtën skemë në Kavajë. Policia dorëzon në Prokurori provat e manipulimit për Vorën.
Zgjedhjet vendore të 21 qershorit kanë rikthyer sëmundjen e vjetër të manipulimit të listave të votuesve për mbushjen e “gropave” elektorale në disa prej qyteteve të vendit. Dy hetime të Prokurorisë në Durrës dhe në Kavajë kanë faktuar shtimin e votuesve artificialë, ndërsa një hetim i tretë pritet të nisë për Vorën, pas një kallëzimi të referuar nga Policia e Shtetit për kryebashkiakun aktual, Fiqiri Ismaili.
Një hetim i nisur nga Prokuroria e Durrësit pas kallëzimeve të Komisionit Qendror të Zgjedhjeve dhe Partisë Demokratike ka arritur në përfundimin se bashkisë së re i janë shtuar 2800 banorë fiktivë në prag të zgjedhjeve vendore.
Në letra figuron se të ardhurit janë shpërngulur nga qytete të ndryshme të vendit dhe për t’u regjistruar në Durrës, kanë përdorur kontrata qiraje me ish-kabinat e rrënuara të plazhit të Currilave apo apartamente të boshatisura. Në realitet, pjesa më e madhe e banorëve të rinj të Durrësit janë emigrantë, të cilët nuk janë kthyer prej vitesh në Shqipëri.
Pas një hetimi 1-mujor, Prokuroria e Durrësit ka arritur në përfundimin se 2800 banorët fiktivë janë përdorur si maskim për shtimin artificial të numrit të votuesve, skemë kjo që bën përgjegjës drejtorin e ndërmarrjes komunale të Plazhit, Alfred Dhuli dhe noteren Ines Aleksi. Të dy ata janë pezulluar nga detyra me urdhër të gjykatës, pasi 2800 kontratat e qerasë ishin firmosur prej tyre.
Një burim i Prokurorisë i tha BIRN në kushtet e anonimatit se skema e manipulimit të listës së zgjedhësve nuk ishte e vështirë për t’u zbardhur.
“Gjetëm raste ku 22 familje ishin të regjistruara në një apartament të vetëm, ndërsa rreth 60 pronarë shtëpish të pyetur prej nesh mohuan të kishin dhënë ambiente me qira,” tha ai.
Rreth 1 muaj më parë, Partia Demokratike akuzoi kryebashkiakun aktual, Vangjush Dako se po manipulonte në favor të tij listat e zgjedhësve. Dako u mbrojt dobët, duke thënë se “lëvizja e lirë e njerëzve është një e drejtë e fituar në demokraci”.
Megjithatë, të 2800 banorët fiktivë ishin përfshirë në listën e zgjedhësve për bashkinë e Durrësit. Pas zbulimit të skemës, Prokuroria i është drejtuar Komisionit Qendror të Zgjedhjeve për të korrigjuar dëmin.
“Prokuroria i ka kërkuar KQZ-së që t’i heqë këta persona nga listat e Durrësit,” thuhet në dokumentin e hetimit.
E njëjta skemë si kjo e Durrësit dyshohet se është përdorur edhe në qytetin e Kavajës, ku Partia Demokratike akuzon kandidatin socialist, Elvis Rroshi se ka shtuar 595 votues brenda 1 jave.
“Ka 194 kontrata fiktive të firmosura nga Elvis Rroshi, përmes së cilave janë dhënë me qira për 3 muaj ambientet e ish-fabrikës së Letrës,” denoncoi pak javë më parë deputeti demokrat, Eduard Halimi.
Prokuroria e Kavajës konfirmon se po e heton rastin dhe se shumë shpejt do të dalë me një përfundim mbi të.
Manipulimi i listës së votuesve ka qenë një prej manovrave më të përdorura nga të dyja kahet e politikës, për të rritur avantazhin e kandidatëve të caktuar në prag zgjedhjesh. Në të shkuarën, askush nuk u ndëshkua për këtë krim elektoral.
Në raportin paraprak të ODHIR-it, ky fenomen shihej me shqetësim nga vëzhguesit ndërkombëtarë.
Megjithatë, ka dyshime se kjo skemë manipulimi vazhdon, edhe pas hetimeve të nisura nga Prokuroria në Durrës dhe Kavajë.
Të hënën, policia e Tiranës dorëzoi në Prokurori një raport për shtim fiktiv të numrit të votuesve në bashkinë e Vorës. Policia nisi verifikimin pas denoncimit në një televizion lokal të dy qytetarëve nga Lushnja dhe Pogradeci, të cilët pretendonin se ishin regjistruar pa dijeninë e tyre.
Fill pas publikimit të rastit, sekretari i Përgjithshëm i Lëvizjes Socialiste për Integrim akuzoi kryebashkiakun aktual të Vorës, Fiqiri Ismaili se po shtonte artificialisht numrin e votuesve.
“Vetëm një noter ka firmosur 500 kontrata qiraje me banorë të qyteteve të ndryshme, në favor të kryetarit aktual të Bashkisë, Fiqiri Ismaili,” denoncoi Luan Rama.
I kontaktuar nga BIRN, këshilltari për mediat i Prokurorisë së Përgjithshme tha se referimi për Vorën ishte dorëzuar të hënën dhe do të verifikohej në ditët në vazhdim.
“Do të hetojmë dhe ndjekim hap pas hapi çdo rast të dyshuar për manipulim me listat e votuesve,” tha ai.
