Alma Hicka ka hedhur poshtë akuzat se ka një konflikt interesi në çështjen DIA-CEZ Shpërndarje, ndërkohë që e ka përshkruar padinë e KLSH-së për shpërdorim detyre lidhur me marrëveshjen me CEZ për riblerjen e OSHEE si të motivuar politikisht.
Nëpërmjet një njoftimi për shtyp të enjten avokatja e përgjithshme e shtetit Alma Hicka, ka hedhur poshtë padinë e KLSH-së për marrëveshjen e qeverisë shqiptare me kompaninë Çeke të energjisë CEZ si dhe i është përgjigjur akuzave të opozitës për konflikt interesi në çështjen DIA-CEZ Shpërndarje.
“Mora dijeni dje nga shtypi për një të ashtuquajtur kallëzim penal që Kontrolli i Lartë i Shtetit ka bërë ndaj personit tim, në ushtrimin e detyrës së Avokatit të Përgjithshëm të Shtetit,” u shpreh Hicka.
“E kuptoj urgjencën e depozitimit ditën e mërkurë, duke pasur parasysh të enjten e akuzave dhe sharjeve, aty ku edhe akuzat e ngritura në të ashtuquajturin kallëzim të KLSH-së, u diktuan disa të enjte me radhë nga porositësi i tyre, në foltoren e Kuvendit të Republikës së Shqipërisë,” shtoi ajo.
Të mërkurën KLSH paditi në prokurori Ministrin e Energjisë Damian Gjiknuri si dhe avokaten e shtetit, duke i akuzuar si i kanë shkaktuar një dëm ekonomik prej 479 milionë euro, rrjedhojë e marrëveshjes midis CEZ dhe qeverisë shqiptare mbi operatorin e shpërndarjes së energjisë elektrike.
Gjiknuri gjithashtu e ka përshkruar padinë si të motivuar politikisht.
“Ky nuk mund të konsiderohet kallëzim i Kontrollit të Lartë të Shtetit ndaj meje por kallëzim i Partisë Demokratike ndaj gjithë qeverisë shqiptare,” tha Gjiknuri.
Dokumente të siguruara nga BIRN tregojnë se ish kreu i bordit të drejtorëve të CEZ Shpërndarje, dega e grupit CEZ në Shqipëri, Josef Hejsek, dhe biznesmeni shqiptar, Kastriot Ismailaj, janë organizatorët e një skeme mashtruese të mbledhjes së borxheve e cila i kushtoi kompanisë miliona euro.
Skema u shfaq pasi grupi CEZ bleu një paketë dominuese aksionesh të kompanisë shqiptare të shpërndarjes së energjisë elektrike OSSH, më 2009, dhe synonte të ndikonte politikanët shqiptarë dhe Entin Rregullator të Energjisë, ERE, përmes ryshfeteve.
Gjithsesi, skema shkoi keq pasi Ismailaj, pronari i Debt International Advisory (DIA), partneri i CEZ për mbledhjen e borxheve në Shqipëri, futi në xhep paratë e kontratës pa bërë asnjë punë reale.
Skemat e Ismailajt besohet se kanë shkatërruar marrëdhëniet mes CEZ dhe qeverisë shqiptare, e cila në janar 2013 i hoqi CEZ Shpërndarje licensën, duke praktikisht e shtetëzuar atë.
CEZ për rrjedhojë nisi proces arbitrazhi kundër Shqipërisë për dëmet. Mosmarrëveshja u zgjidh më vonë pasi Tirana, nën presion nga Republika e Çeke lidhur me statusin e vendit kandidat për anëtar në BE, i pagoi CEZ-it 95 milionë euro për të rimarrë pronësinë e kompanisë.
Ismailaj, i cili ndërkohë është arrestuar i akuzuar për pastrim parash dhe mashtrime të rënda, ka hedhur gjithashtu në arbitrazh CEZ Shpërndarje, tashmë nën pronësinë e qeverisë dhe e emërtuar OSHEE. Ai po kërkon 130 milionë euro dëmshpërblim për prishje të njëanshme të kontratës në një çështje që mbetet pezull në Qendrën Ndërkombëtare të Arbitrazhit në Vienë.
Hicka është akuzuar nga opozita se ka një konflikt interesi në çështjen DIA-CEZ Shpërndarje, për shkak se studio ligjore ku punon bashkëshorti i saj, Haxhia & Hajdari, ka pasur si klient në të kaluarën kompaninë e mbledhjes së borxheve DIA. Përmes kësaj zyre ligjore, Ismailaj regjistroi kompaninë DIA në Ishujt Virgjin Britanikë në 7 korrik 2010.
“Akuzat për mua në fakt kanë filluar një vit më parë në sallën e Kuvendit, ku në vazhdën e turpshme të fjalimeve me libër shtëpie për kundërshtarët realë apo imagjinarë, u përmend edhe bashkëshorti im,” Hicka u shpreh.
“Akuzat pastaj u përshkallëzuan në përgojimin tim lidhur me përfshirjen e studios Clifford Chance në çështjen DIA, ndërkohë që është tërësisht e qartë dhe publike që çështja DIA nuk u ndoq asnjëherë në arbitrazh nga Avokatura e Shtetit,” shtoi ajo.
